Саха сиригэр ааспыт сууккаҕа эбии 136 киһи хоруона хамсыгар сыстыбыта биллибит. Бу туһунан брифинг кэмигэр вице-премьер Ольга Балабкина иһитиннэрдэ.
"Хомойуох иһин, киин куораппытыгар элбэх киһи ыалдьа турар, 68 киһи ыалдьыбыт. Маны таһынан 16 ыарыһаҕы Алдаҥҥа, 11 — Мииринэйгэ, 10 — Нерюнгрига, 4 — Ленскэйгэ бигэргэттибит. Бу улуустарга производствоҕа үлэлиир дьон үгүстэ ыалдьа турар. Маны таһынан 3 ыарыһах Бүлүүгэ, Мэҥэ Хаҥаласка уонна Хаҥаласка булулунна. Иккилии ыарыһаҕы — Аммаҕа, Намҥа, Ньурбаҕа, Өймөкөөҥҥө, Сунтаарга уонна Уус Алдаҥҥа бигэргэттилэр. Биирдии ыарыһах Абыйга, Булуҥҥа, Горнайга, Өлүөхүмэҕэ, Тааттаҕа уонна Чурапчыга бэлиэтэннэ", - диэтэ Ольга Валерьевна. Бу улуустарга дьиэ кэргэн иһигэр сутуллуу бэлиэтэнэр. Ольга Балабкина атырдьах ыйын 15 күнүгэр дылы Роспотребнадзор уурааҕынан булгуччулаах быһыыны ылыы түмүктэнэрин сэрэттэ. Суукка устатыгар 1986 анаалыһы оҥорбуттар, уопсайа хамсык саҕаланыаҕыттан 1 284 825 анаалыс чинчиллибит. Билигин өрөспүүбүлүкэҕэ «Спутник V» уонна «Спутник Лайт» быһыылар бааллар.
