Муус устар 29 күнүгэр улуус баһылыга Алексей Иннокентьев уонна кини бастакы солбуйааччыта Артур Яковлев Биисинэс-инкубаторга Ньурба куоратын уонна чугастааҕы нэһилиэктэр урбаанньыттарын кытары көрүстүлэр.
Салайааччылар улууска ыытыллар үлэ-хамнас уонна былааннар тустарынан иһитиннэрии оҥордулар, урбаан эйгэтигэр турар инники соруктарга тохтоотулар, ыйытыыларга хоруйдаатылар. Аһаҕас кэпсэтиигэ урбаанньыттар бэйэлэрин санааларын уонна туруорсууларын тиэртилэр.
Сүбэ мунньах түмүгүнэн, Биисинэс-инкубатор генеральнай дириэктэригэр Н.М. Михайловаҕа Ньурба куоратыгар оҥорон таһаарар уонна агро-кластеры тэрийэргэ этиилэри, итиэннэ үлэ былаанын ырытан оҥорон киллэрэригэр сорудахтанна. Нэһилиэнньэҕэ бытовой, култуурунай-аралдьытар, туристическай, тыа хаһаайыстыбатын бородууксуйатын астыыр-үөллүүр, ритуальнай өҥөлөрү сайыннарарга сорук турар. Ательелар, парикмахерскайдар үлэлиир дьоҥҥо табыгастаах буоларын курдук, өрөбүл күнү аахсыбакка үлэлииллэрэ ордугун эттилэр. Урбаанньыттар туруорсууларын учуоттаан, улууска солуок пуондата тэриллиэн сөп. Маныаха бырайыактарынан үбүлээһин оҥоһуллуоҕа, эһиилгиттэн тэрил ыларга улуустан субсидия көрөргө былаанныылар.
Кэпсэтии түмүгэр, баһылык А.М. Иннокентьев улууска урбаан эйгэтин сайыннарыыга анаан этиилэри хомуйан, быйыл бырайыактары ырытан олоххо киллэриэхтэрин, эһиилгиттэн улууска наадалаах, ол иһигэр олохтоох оҥорон таһаарыыны уонна нэһилиэнньэҕэ төлөбүрдээх өҥөлөрү сайыннарарга туһуламмыт бырайыактары олоххо киллэриигэ, итиэннэ быйыл тыа хаһаайыстыбатыгар үбүлээһин көрүллүбүтүн курдук, урбаан эйгэтигэр эбии үп көрүллүөҕүн иһитиннэрдэ.
Источник: СӨ Урбаанньыттары өйүүр киинэ
