Дьокуускайдааҕы өрөспүүбүлүкэ клиническэй балыыһатыгар хоруона хамсыгыттан өрүттүбүт ыарыһахтарга аналлаах 30 куойкалаах реабилитационнай салаа арыллыаҕа. Бу туһунан балыыһа кылаабынай бырааһа Николай Васильев эппит.
"Былырыын кулун тутар 19 күнүгэр биһиэхэ аан бастакы коронавирус ыарыылаах киһи киирбитэ. Оччолорго биһиги ковид ыарыһахтарга анаан уларыйан барбыппыт, коронавирустаах эрэ дьону эмтиир салаалар арыллыбыттара. Билигин 3-с уонна 4-с куорпустарга 160 куойкалаахпыт, реанимация салаатыгар —36, Перинатальнай кииҥҥэ — коронавирустаах хат дьахталларга анаан 20 куойкалаахпыт. Маны таһынан, Губин уулуссатыгар баар устудьуоннар уопсайдарыгар 100 куйокалаахпыт. Билигин даҕаны өрөспүүбүлүкэҕэ хамсык балаһыанньата тыҥааһыннаах. Холобур, ити Губин уулуссатыгар 100 куйокабытыгар номнуо 160 ыарыһах сытар. Ыарыһах ахсаана эбиллэ турар, онон нэһилиэнньэни быһыыны ыларгытыгар уонна туох баар хааччахтыыр миэрэлэри тутуһа сылдьаргытыгар ыҥырабын", - диэтэ Николай Васильев.
Кылаабынай быраас эппитинэн, балыыһа 98% үлэһитэ бары быһыыны ылбыттар. Быраастар аатырбыт Коммунаркаҕа баран билиилэрин хаҥатан кэлбиттэр, маны таһынан Москубаҕа Крылатскай госпитальга үөрэнэн хоруона хамсыгар ылларбыт дьону эмтииргэ сэртипикээти ылбыттар. 12020 сылга уопсайа 3057 телемедецина консультацията ыытыллыбыт, оттон быйыл сыл аҥаарыгар — 2086.
Былырыын балыыһаҕа 4760 коронавирустаах киһи сытан тахсыбыт, 242 хамсыкка хаптарбыт хат дьахтары төрөппүттэр. Оттон быйыл алта ый иһигэр 2601 ыарыһах сытан тахсыбыт, 78 дьахтар төрөөбүт. Күн бүгүн балыыһаҕа 370 киһи сытар, реанимацияҕа —30.
