Быйыл саас Алиса Теплякова диэн аҕыс саастаах Москуба оҕото кэмин иннинэ орто оскуоланы бүтэрбитин, эбиитин Судаарыстыба кэлим эксээмэнин (СКЭ) туттарбытын туһунан балачча суруйбуттара. Аны, бу күннэргэ кыыс Ломоносов аатынан МГУ-га Психология факульетыгар туттарсан киирбитин туһунан сонун кэллэ. Ол туһунан МГУ психфагын пресс-сэкирэтээрэ Александра Долгих иһитиннэрэр.
Урут даҕаны аҕа саастаах көлүөнэ Паша Коноплев, Саша Путря, Ника Турбина, Алеша Султанов курдук таһыччы өйдөөх, вундеркинд оҕолор баалларын истэр этибит. Ол эрээри кинилэр ортолоругар 8 саастарыгар университетка киирбиттэр өссө суохтара.
Алиса бүддьүөт миэстэтигэр кыайан хапсыбатах. Киирии эксээмэннэригэр 48 эрэ баалы ылбыт. Ол да буоллар аҕата Евгений Тепляков “төлөбүрдээх үөрэҕи уйунар кыахтаах ыалбыт” диир.
Кыыс МГУ-ну икки сылынан, ол эбэтэр 11 сааһыгар, бүтэрэр былааннаах үһү.
Санаттахха, үөһэ ахтыллыбыт сэбиэскэй кэм вундеркиннара бука бары судургута суох дьылҕаламмыттара. Үгүстэрэ олоххо миэстэлэрин булбатахтара, кимнээх эрэ төбөлөрүнэн ыалдьан балыыһаҕа сытан, эбэтэр ол кэннэ уһаабакка өлбүттэрэ.
