Роспотребнадзор этэринэн, өрөспүүбүлүкэҕэ билигин даҕаны хамсык балаһыанньата дьиксиниилэри үөскэтэр: күн бүгүн эбии 147 саҥа ыарыһаҕы буллулар, олортон 86 киһи киин куораппытыгар ыалдьыбыт. Бу туһунан брифинг кэмигэр Ольга Балабкина иһитиннэрдэ.
Суостаах ыарыы маннык улуустарга эмиэ бэлиэтэммит: Бүлүүгэ, Кэбээйигэ, Нерюнгрига —5-тии, Аммаҕа, Ленскэйгэ, Мииринэйгэ —4-түү, Булуҥҥа, Мэҥэ Хаҥаласка, Намҥа, Орто Халымаҕа, Усуйаанаҕа —3-түү, Аллайыахаҕа, Дьааҥыга, Муомаҕа, Уус Алдаҥҥа, Хаҥаласка, Чурапчыга, Эбээн Бытантайга— иккилии, Үөһээ Бүлүүгэ, Өймөкөөҥҥө, Өлүөхүмэҕэ, Сунтаарга, Тааттаҕа —1-дии.
Суукка устатыгар 3965 хамсыкка анаалыһы оҥорбуттар. Анаалыһы хоруона хамсыгар хаптарбыттартан эрэ буолбакка, ОРВИлаахтартан, баахтанан үлэлии барааччылартан эмиэ ылаллар.
Быһыыны биэрии салҕанан барар, билигин 461755 доза "Спутник Лайт" кэлэн сытар. Билиҥҥи туругунан бастакы быһыыны 302480 киһи ылбыт, ревакцинацияны 4590 киһи ылбыт. Өрөспүүбүлүкэҕэ баар вакцинаттан 70%-нын туһаммыттар. Бүгүн быһыыны сүгүн-саҕын ылан испэт үөһээ бүлүүлэргэ өрөспүүбүлүкэтээҕи суһалы ыстаап бөлөҕө барбыт. Онно кинилэр тоҕо быһыыны ылбаттарын быһаарыахтара уонна кэккэ миэрэлэри ылыахтара.
