Күн бүгүн Саха сирэ сууккаҕа хоруона хамсыгар хаптарыытынан дойдуга 40-50-с миэстэлэргэ турар. Ыарыы араҕар санаата суох. Хамсык тарҕаныытын коэффициенэ бииргэ тэҥнэһэр. Ыарыһах ахсаана Бүлүү, Горнай, Уус Майда, Хаҥалас улуустарыгар биллэ улаатар. Дьокуускайга уонна 14 улууска реанимацияҕа 102 ыарыһах, олортон 21 киһи ыарахан туруктаах ИВЛ аппараатыгар холбонон сыталлар. Бу туһунан Ил Дархан хамсыгы бохсор суһал ыстаап мунньаҕар эппит.
Кини кэнники кэмҥэ улуустарга от үлэтэ, өрт уотун кытары охсуһуу будулҕаныгар хоруона хамсыгын бохсуу иккис былааҥҥа киирбитин, ол ончу сөбө суоҕун туһунан тоһоҕолоон эттэ. Күһүҥҥү тумуу кэлээри турдаҕына, билигин туох баар хара күүһү ыарыы тарҕамматыгар ууруоххаа наадатын эттэ. Улуус баһылыктарыгар дьон ОРВИ сибикилээх буоллулар да, тута быраастарга этинэллэригэр өйдөтөр үлэни күүһүрдэргэ сорудахтаата. Ити хамсык тарҕамматын, дьон ыарахан турукка киирбэттэрин туһугар наада. Маны таһынан суол сабыллыар дылы эминэн-томунан хааччыйалларыгар сорудахтаата. Өссө биир улахан соругунан уһуйааннарга уонна оскуолаларга туох баар миэрэни тутуһалларын, ыарыы тарҕамматын хонтуруоллааһын буолар. Онуоха педагогтары уонна оҕолору кыраҕатык кэтээн көрөллөрүгэр эттэ. Ыарыы тарҕанна да, суһал миэрэ ылыллыахтааҕын тоһоҕолоото.Баһылыктар социальнай эбийиэктэр сылаас буолалларын, ититиини биэриини соспотторун хааччыйыахтаахтар. Быыбардар буолаары туралларынан, быыбардыыр учаастактарга санитарнай ирдэбили тутуһуу кытаанах хонтуруолга ылыллар. Айсен Николаев Саха сиригэр бастакы быһыыны 326318 киһи , иккиһи — 302168 киһи ылбыттарын эттэ. Сорох улуустарга быһыыны биэрии былаана 90-100 бырыһыан туолбут: Үөһээ Халыма, Эдьигээн, Муома, Аллараа Халыма, Орто Халыма улуустара. 60 бырыһыантан намыһах көрдөрүүлээх улуустар: Нам уонна Чурапчы, 65-тэн кыра Амма, Булуҥ, Үөһээ Бүлүү, Кэбээйи, Нерюнгри, Уус Алдан. Ревакцинацияны 5305 киһи ааспыт.
