Үгэскэ кубулуйбут "Продовольствие-2021" тыа хаһаайыстыбатын бородууксуйатын дьаарбаҥката киин куораппытыгар үс сиринэн бу өрөбүллэргэ, балаҕан ыйын 25-26 күннэригэр ыытыллыаҕа. Бу туһунан ТХМ пресс-сулууспата иһитиннэрэр.
Быйыл хамсык хааччахтарынан сибээстээн, олус элбэх дьон мустубатын диэн 3 сиринэн ыытыллыаҕа: Киров уул. 12/1 баар "Аччыгый базар" ырыынагар, АГАТУ (ССТХА) тиэргэнигэр уонна Юрий Гагарин атынан култуура киинин иннигэр (Можайскай уул., 25).
Тэрийээччи — "Якутские продукты" Роспотребнадзортан дьаарбаҥканы тэрийэргэ көҥүлү ылбыт. Бастаан утаа 4 сиринэн ыытаары гыммыттар да, быйыл 60 эрэ кыттааччы сайаапканы биэрэн 3 сиринэн ыытар буолбуттар.
Куорат олохтоохторугар сибиэһэй бородууксуйаларын Амма, Булуҥ, Таатта, Нам, Мэҥэ Хаҥалас, Уус Алдан, Усуйаана, Хаҥалас уонна Дьокуускай бааһынайдара атыылыахтара. Дьаарбаҥкаҕа эт ас, балык, үрүҥ ас арааһа, килиэп уонна кондитерскай ас эгэлгэтэ, сир аһын рааһа, мүөт, норуот маастардарын оҥоһуктара уонна олохтоох оҕуруот аһа атыыланыаҕа.
