Айсен Николаев бүгүн, балаҕан ыйын 28 күнүгэр, Бэс Күөлүгэр өрт уотугар дьиэлэрин былдьаппыт Екатерина уонна Алексей Саввиновтар дьиэ кэргэттэригэр тутуллубут бастакы дьиэ күлүүһүн туттарда.
Кинилэр дьиэлэрэ "Кэскил" түөлбэҕэ биир бастакынан тутуллан киирдэ. Ил Дархан баһаартан эмсэҕэлээбиттэргэ бастакы сыбаайаны атырдьах ыйын 20 күнүгэр түһэрбиттэрин санатта. "Үгүстэр бачча кыра кэмҥэ саҥа дьиэлэри дьэндэтиэхтэрэ диэн итэҕэйбэтэхтэрэ, оттон бүгүн биһиги сэлиэнньэҕэ тутуу тэтимнээхтик барарын көрөбүт. Ол эбэтэр, биһиги күүспүтүн сомоҕолоон ыарахаттары тумнар кыахтаахпытын өссө төгүл кэрэһэлиир", - диэтэ Айсен Николаев.
Кини Бэс Күөлүн олохтоохторугар баҕа өттүлэринэн көмөлөспүт дьоҥҥо махталын биллэрдэ. Маны таһынан кини 200 уонна 25 мөл. солк. биэрбит "АЛРОСА" уонна "Роснефть" салалталарыгар махтанна. Оттон Дьокуускайга уопсастыбанньыктар көҕүлээн үлэлэппит штаб 7 мөл. 800 тыһ. солк. хомуйбут, ону эмсэҕэлээбитэр мал-сал ылыналларыгар тыырыахтара.
"Биһиги дьиэбит сырдык, тупсаҕай, суобастаахтык туппуттар. Билигин саамай үчүгэй түбүктэр күүтэллэр — дьиэтийэн барыахпыт. Биллэн турар, баһаар диэн наһаа ыарахан этэ, ол эрэн биһиги ону аастыбыт. Федеральнай уонна бэйэбит былааспытыгар, Владимир Путиҥҥа, Айсен Николаевка, тутааччыларга, бары көмөлөспүт дьоҥҥо муҥура суох махталбытын биллэрэбит. Биһиги кыһалҕабытыгар элбэх киһи көмөлөһөн күүһү-уоҕу, эрэли биэрдэ", - диэтэ Екатерина Саввинова.
Санатар буоллахха, уопсайа 34 дьиэ эмсэҕэлээбитэ. Алтынньы 15 күнүгэр дылы Бэс Күөлүгэр чөлүгэр түһэрии үлэлэрэ түмүктэниэхтэрэ.
