Арассыыйаҕа Аҕа күнэ баар буолуутун Арассыыйа Федерациятын иһинэн Оҕо быраабын Боломуочунайа Анна Кузнецова турууласпыт. Бу боппуруоһу кини «Саха сирин аҕаларын Лиигэтэ» уопсастыбаннай түмсүү бэрэссэдээтэлэ Айхал Габышевы кытта соторутааҕыта Саха Сиригэр кэлэ сылдьан быһаарсыбыт уона санаатын үллэстибит:
— Саха сиригэр дойду үрдүнэн биир бастакынан аҕалар хамсааһыннара үөскээбитэ. Айхал Габышев этэринэн Саха сирин аҕаларын Лиигэтигэр 40 тыһыынча көхтөөх аҕа баар. Бу олус сөп! Бу олус астык! Уонна бу олус дьоһун көстүү! Мин билэрбинэн, Саха сиригэр эппиэтинэстээх, көхтөөх, элбэх оҕолоох, ситиһиилэрдээх аҕаларга туспа анал бэлиэлэр бааллар. Манна сыл ахсын Аҕа Күнэ ыытыллар. Мин, Саха сиригэр кэлэн аан маҥнайгытын аҕалары кытта Арассыыйа Федерациятыгар Аҕа Күнэ олохтонуутун туһунан быһаарсыбыппыттан олус үөрдүм. Арассыыйа ханнык даҕаны эрэгийиэнигэр аҕалар түмсүүлэрин кытта Аҕа күнүн ыытыы туһунан быһаарсыбатахпыт. Ол атын эрэгийиэннэргэ эмиэ манна курдук аҕалар түмсүүлэрэ тэриллэн үлэлииллэригэр, үчүгэй аҕалар, кинилэр дьиэ кэргэннэрин, кыһамньыларын туһунан үтүө сонуннар тарҕаныахтарын уонна оҕолорго үтүө холобур буолуохтарын, инникитин бэйэлэрэ эмиэ киһи киэнэ үтүөтэ, дьоһун ийэ уонна аҕа буолан тахсыахтарын баҕарабын!
Ол аата, биһиги биир дойдулаахпыт Айхал Габышев бу кэскиллээх этиини киллэрбитэ үрдүк таһымҥа өйөбүлү ылбыт уонна судаарыстыбаннай бырааһынньык буоларын ситиспит? Бу туһунан Айхал Габышев бэйэтэ бу курдук этэр:
- Бу сылтан саҕалаан Арассыыйа үрдүнэн Аҕа Күнүн алтынньы үһүс өрөбүлүгэр ылар буолуохпут. Биһиги бары бэркэ билэрбитинэн, 1998 сылтан дойдубутугар биһиги Ийэ күнүн бэлиэтиибит, 2008 сылтан Дьиэ кэргэн, таптал уонна бэриниилээх буолуу бырааһынньыгын бэлиэтиибит, оттон 1949 сылтан норуоттар икки ардыларынааҕы Оҕо көмүскэлин күнүн ылабыт. Оттон Аҕа күнэ диэн, хомойуох иһин, олохтоно илик.
Арассыыйа Федерациятын иһинэн Оҕо быраабын Боломуочунайа Анна Кузнецова биһиги өрөспүүбүлүкэбитигэр кэлэ сылдьар кэмигэр биһиги Арассыыйаҕа Аҕа күнэ баар буолуохтааҕын туһунан этиилэри киллэрбиппит уонна Арассыыйа Федерациятын Судаарыстыбаннай Дууматын дьиэ кэргэн, дьахтар уонна оҕо боппуруостарын Кэмитиэтин Арассыыйа Федерациятын Судаарыстыбаннай Дууматын дьиэ кэргэн уонна оҕо саас боппуруостарын Кэмитиэтэ диэҥҥэ уларытыы боппуруоһун ырыппыппыт. Бу этиилэри биһиги 2017 сыллаахха Саха Сирин аҕаларын II сийиэстэригэр иһитиннэрбиппит. Анна Юрьевна биһиги бу улахан этиибитин өйүүргэ сөбүлэҥин биэрбитэ.
Өрөспүүбүлүкэ үрдүнэн Аҕалар Лиигэлэрин иһинэн 700 аҕа сүбэтэ баар, ол иһин саамай элбэх ахсааннаах уопсастыбаннай тэрилтэ быһыытынан биллибитэ...
...Арассыыйа үрдүнэн Аҕа күнэ баар буолуутун суолтатын уонна наадатын этэр буоллахха, аҕа оруолун уонна аналын үрдэтэн дойдуга дьиэ кэргэн үнүстүтүүтүн бөҕөргөтөбүт. Арассыыйаҕа Аҕа күнэ аҕалар хамсааһыннарын уонна судаарыстыбаннай дьиэ кэргэн политикатын кыһалҕатын быһаарыытыгар көмө буолуоҕа. Дьиэ кэргэҥҥэ аҕа туллубат тутаах, оттон дьиэ кэргэн күүстээх судаарыстыба төрдүнэн буолар. Аҕалар эппиэтинэстээх буолуохтаахтар, дьиэ кэргэннэригэр болҕомтолорун ууруохтаахтар уонна дьонун харыстыы, бүөбэйдии сылдьыахтаахтар, оҕолору иитиигэ актыыбынайдык кыттыахтаахтар. Хас биирдии оҕону биһиги бэйэтин дойдутугар бэриниилээх гына иитэн таһаарыахтаахпыт, ол барыта дьиэ кэргэнтэн саҕаланарын өйдүөхтээхпит.
Дьиэ кэргэнтэн ураты улахан суолталаах бу олоххо суох, дьиэ кэргэннэр холбоһоннор улахан куораттары, эрэгийиэннэри үөскэтэллэр. Оттон эрэгийиэннэр диэн бэйэтэ биир улахан дойду! Арассыыйа эрэгийиэннэринэн күүстээх, оттон эрэгийиэннэргэ күүстээх Арассыыйа наада!
