Саха сирин аҕа баһылыга Айсен Николаев, Аччыгый билим академиятын ректора Василий Павлов үлэтиттэн уурайыытын тохтотто. Санатар эбит буоллахха ректор, оҕолор олорор уопсайдарын, хамсыгы эмтиир стационарга кубулуталларын утарбыта.
Ол туһунан Айсен Николаев бэйэтин телеграм-каналыгар биллэрдэ.
Аҕа Баһылык бэйэтин социальнай ситимигэр бу курдук этиннэ: «Бэҕэһээ Аччыгый билим академиятыгар буолбут айдаан – бу биһиги бырабыытылыстабытыгар туох буола турарын көрдөрөр ырылхай түбэлтэ. Павлов туһугар ылыллыбыт дьаһаллары мин барытын көтүрэбин. Үөрэҕирии миниистиригэр Михаил Сивцевка – кытаанах быгаабар. Үрдүк салалтаттан сөбүлэҥэ, илии баттааһына суох дьону ууратарыгар. Бырабыытылыстыба премьерыгар – Андрей Владимирович Тарасенкоҕа – улахан сэмэ. Маннык үлэ салгыы сатаммат. Үчүгэйдик бэрэбиэркэлээбэккэ эрэ миэхэ ситэтэ суох иһитиннэрии тиэрдэллэригэр».
Үөрэх кыһатын салайааччыта Василий Павлов бэйэтин өртүттэн иһитиннэрэр: «Аҕа баһылык миигин уураппыт бирикээстэрин көтүрдэ. Оҕолор олоруохтаах уопсайдарыгар инфекционнай балыыһа быстах кэмҥэ эрэ олохтонуо диэн, Айсен Сергеевич эрэннэрдэ. Билигин, уопсайга номнуо 25 ыарыһах эмтэнэ киирдэ. Былаастар сотору кэминэн стационарга саҥа уораҕай булуох буоллулар».
Василий Павлов оҕолор булгуччу күнүскү эрэ үөрэххэ билии ылыахтаахтарын тоһоҕолоон туран бэлиэтээтэ. Арассыыйа таһымынан ыытыллар космическай инженерия федеральнай симиэнэтигэр , ахсынньы ыйга диэри киирсэллэригэр сыал-сорук турда.
