Дойду бырабыыталыстыбата "Үөрэҕирии" национальнай бырайыак иитинэн Саха сиригэр саҥа үөрэх миэстэлэрин таһаарарга эбии харчыны көрдө. Онуоха туһааннаах уураахха премьер Михаил Мишустин илии баттаабытын туһунан Ил Дархан Айсен Николаев эттэ.
Айсен Сергеевич эппитинэн, Кэбээйи улууһун Сайылык сэлиэнньэтигэр 275 миэстэлээх таас оскуоланы тутууга 210 мөл. солк. көрүллүөҕэ. "Мин былырыын Кэбээйигэ сылдьыбытым, онно нэһилиэнньэ уонна улуус салалтата саҥа оскуоланы тутуу туһунан көтөхпүттэрэ. Билигин дойду бырабыыталыстыбатын өйөбүлүнэн биир сыл эрдэлээн саҥа оскуоланы тутар буоллубут! Чопчулаатахха, 2022 сыл ахсынньытыгар киириэҕэ, оттон эрдэттэн 2023 сылга тутуохпут дии сылдьыбыппыт", - диэтэ Ил Дархан.
2021-2022 сс. Саха сирэ саҥа үөрэх миэстэтин таһаарарга 1 млрд 104 мөл. 343 тыһ. солк. ылыаҕа.
