Өбүгэ үгэһин өрө туппут– олоххо тардыһыылаах эдэр дьон

Кэнники кэмнэргэ, тыа сиригэр ынах сүөһү аҕыйыы турар сүрүн биричиинэтэ сэбиэскэй кэмтэн саҕалаан, сүөһүнү - аһы тутан , иитэн , олорбут кырдьаҕас көлүөнэ дьон сорохторо олохтон туораан, сорохторо сааһыран, ынах сүөһүнү туталларын кыччатан, тохтотон сүөһү төбөтө сылын аайы аҕыйаан иһэригэр тиэрдэр.

Тыа хаһаайыстыбатын министиэрстибэтэ эдэр фермердэри өйүүр сыалтан "Саҕалааччы фермер", "Агростартап " диэн конкурстары ыытан балайда элбэх эдэр ыччат бу тыа хаһаайыстыбатын гранын ыларга кыттар буоллулар.

Тыа сирин , тыа хаһаайыстыбатын сайыннарыыга, сүөһү-сылгы ииттэн, бэйэ оҥорон таһаарыы тэрийэн, дохуот оҥорорго эдэр ыччат ылыстаҕына эрэ өбүгэттэн илдьэ кэлбит сүрүн дьарыкпытын илдьэ хаалыахпыт, салгыы сайыннарыахпыт диэн өйдөбүл эдэр дьонҥо киирэн эрэрэ элбэх эрэли үөскэтэр.

Үөһээ Бүлүү улууһун Балаҕаннаах нэһилиэгэр ынах-сүөһү үөһэ эппит биричиинэннэн аҕыйаан испитэ.

Дьиҥэр оттуур сирэ эппиэттииринэн сүөһү-сылгы ииттэр кыаҕа суох нэһилиэк буолбатах.

Сааһын айылҕа уута халытар Саллыгынай, Ньэмиэһинньик, уонна да атын үтүө алаастардаах , Ороһу - Нэгэдьээк мелиоративнай системата ньүөлсүтэр тыа алаастардаах мааны дойду Балаҕаннаах барахсан.

Ынах сүөһү аҕыйаатаҕына нэһилиэк социальнай-экономическай сайдыытыгар улаханнык охсоро биллэрин учуоттаан эдэр дьону тыа сиригэр олохсутан үлэлэтэргэ үлэни - хамнаһы тэрийэр үлэни ыыппыппыт.

2016 икки эдэр уолаттары Егоров Иван Алексеевыһы, Кардашевскай Петр Владимировыһы кэпсэтэн, тылбын ылыннаран Тыа хаһаайыстыбатын министиэристибэтин "Саҥа саҕалааччы фермер" диэн граныгар кыттан, ТХМ хамыыһыйатын ааһан кыайбыттара.

Тылбын ылынан диэн мээнэҕэ эппэтим. Бизнес - план оҥороллоругар сүбэлэһэн трактор иҥин ылбакка ыанар ынахтары ыларга былааннаабыппыт. Кинилэр иккиэн 2016 сылга 4 - 5 ынах сүөһү төбөтүттэн саҕалаабыттара.

Егоров Ваня билинҥи туругунан 90 тахса ынах сүөһүлээх, Кардашевскай Петя 80 тан тахса сүөһүлээх . Петя ТХ граныгар кыттаары куоракка син балайда элбэх хамнастаах охраннай тэрилтэҕэ үлэлии сылдьан кэлбитин бэлиэтээн аһарыахха сөп .

Киниэхэ МТЗ - 82 тракторы убайа Степан Кардашевскай дьиэ кэргэнэ ылан биэрбиттэрэ .

Егоров Ваня дьаһалта МТЗ - 82 тракторын уларсан үлэтигэр туттар. Кэлин, бэйэлэрин кыахтарынан охсор, мунньар, пресстиир агрегат атыылаһан булуммуттар .

Кэнники сылларга ТХМ тэ тыа хаһаайыстыбатын гранын ылааччылары бэрээдэктиир буолан эрэрэ үчүгэй . Урукку өттүгэр мэлдьэх буолбатах үгүс кыттааччылар бизнес - планнарыгар киллэрэн МТЗ - 82 трактор, прессподборщик , охсор , мунньар ылаары кыттан , ылан хаһаайыстыбаларын үчүгэйдик тэриммэккэ 5 сылынан ити тэриллэри босхо ылан хаалбыттара баар суол.

Егоров Иван, Кардашевскай Петр улуус эдэр дьонугар холобур буолар уолаттар.

Балаҕаннаах нэһилиэгин ынах сүөһүтүн аҥаара бу уолаттарга баар. Бааһына сирин оҥостон ыһыы ысталлар , инники былааннара элбэх . Тыа сирэ маннык дьонноох буоллаҕына инникитэ кэскиллээх буолуо.

Саха өрөспүүбүлүкэтин норуотун хаһаайыстыбатын үтүөлээх үлэһитэ, Үөһээ Бүлүү улууһун, Балаҕаннаах нэһилиэгин баһылыга, Степан Дмитриев .