Саха сириттэн дойду инники күөҥҥэ сылдьар үрдүк үөрэҕин кыһаларыгар туттарсан кииригэ Уһук Илин 20 бастыҥ оскуолатын ахсааныгар 9 оскуола киирдэ. Бу туһунан Айсен Николаев Телеграм каналыгар суруйда.
"Эриэйтиҥҥа бастакы миэстэҕэ Өрөспүүбүлүкэ лиссиэй-интэринээтэ, үһүскэ — В.П. Ларионов аатынан Физико-тэхэньиичэскэй лиссиэй сылдьаллар. Испииһэккэ Куораттааҕы классическэй гимназия, Дьокуускай куораттааҕы лиссиэй, 2-с №-дээх Национальнай политехническэй орто оскуола, А.Г уонна Н.К. Чиряевтар ааттарынан Дьокуускай куораттааҕы национальнай гимназия, 31-с №-дээх оскуола, 26-с №-дээх сорох биридимиэттэри дириҥэтэн үөрэтэр оскуола уонна Дьокуускай 17-с №-дээх оскуолата киирбиттэр. Маладьыастар! Кытаатыҥ!", - диэн Айсен Николаев суруйбут.
Эриэйтини Арассыыйа бөдөҥ эриэйтинниир ааҕыныстыбата — RAEX (РАЭКС-Аналитика) оҥорбут.