Алтынньы 31 к. автомобилист күнэ буолан ааста. Бэлиэ күнү көрсө үлэни булууга көмөлөһөр headhunter.ru онлайн-платформа Арассыыйа үрдүнэн суоппарга саамай элбэх хамнаһы ханна төлүүллэр эбит диэн 2021 с. тохсунньутуттан тахсыбыт 300 тыһ. ыҥырыыны анаалыстаабыт. Манна Саха сирэ бочуоттаах иккис миэстэҕэ тахсыбыт.
Уопсайынан, хамсык икки сылыгар, 2019 с. тэҥнээтэххэ, тэрилтэлэргэ суоппарга наадыйыы 77% үрдээбит. Онон суоппар үлэтэ “хамсык үтүөтүнэн” атыыһыт (бэрэдэбиэс) уонна эргиэн менеджерын курдук идэлэри кытта дойду үрдүнэн биир саамай наадалаах үлэ буолбут.
Саха сиригэр сыл саҕаланыаҕыттан тэрилтэлэр 1200 суоппарга наадыйбыттар. Орто хамнастара 92,8 тыһ. солк. эбит. Бастакы миэстэ Тыва, 94,0 тыһ. солк. Үһүскэ Магадан, 92,3 тыһ. солк. Арассыыйа үрдүнэн, суоппар орто хамнаһа 67,7 тыһ. солк. Саамай кыра хамнаһы Адыгеяҕа, 52,4 тыһ. солк. төлүүллэр. Саха сиригэр саамай элбэх суоппарга сир баайын хостуур хампаанньалар наадыйаллар.
Дьиктитэ диэн ити үлүгэр үрдүк хамнаска суоппардыан баҕалаах олох аҕыйах эбит. Саха сиригэр 1 миэстэҕэ – 1,9 киһи күрэстэһэр. Дойду үрдүнэн – 2,5 киһи. Арай суоппар үлэтэ Тываҕа былдьаһык эбит, 1 миэстэҕэ 5 киһи анньыһар.
Владимир Степанов
