Нэдиэлэ устата хамсык арҕаныытын туруга хайдаҕыттан көрөн, суһал ыстаап быһаарыныы ылыныахтаах.
Ол туһунан Саха сирин вице-премьера уонна суһал ыстаап салайааччытын солбуйааччата Ольга Балабкина киэҥ эйгэҕэ иһитиннэрдэ..
Кини салгыы маннык диэн бэлиэтээтэ: «Бэҕэһээ сонуннарга, Новосибирскай уобаласка сэтинньи 8 чыыһылатын кэнниттэн өссө салгыы үлэлээбэт күннэри уһатарга диэн быһаарыныы ылыннылар. Оттон биһиги, ыарыы туһунан нэдиэлэтээҕи да субуокката суох олорон, итинник дьаһал ылыныахпытын өссө да эрдэ».
Маныаха, өссө Дьокуускай куорат Медицинскэй Киинин кылаабынай бырааһа Римма Яковлева хааччахтааһын өссө да уһуур чинчилээҕин бэлиэтээн туран эттэ. Кини этэринэн быһыы ылбыт гражданнар ахсааннара сөптөөх кэрдиискэ тиийбэтэҕинэ – үлэлээбэт күннэр уһуур бадахтаахтар.
Яковлева эттэ: «Быһыыны нэһилиэнньэ 70 % ылара булгуччулаах. Ол таһымы ситистэхпитинэ эрэ хааччахтааһын уһуллар. Билиҥҥи кэм туругунан өрөспүүбүлүкэ үрдүнэн былаан 55 % ситиһилиннэ, оттон Дьокуускайга – 62 %. Өрүүр күннэри уһатар туһунан быһаарыныыны нэдиэлэ бүтэһигэр, быһыыны төһө элбэх киһи ылбытынан көрөн таһаарыахтара».
