Сэтинньи 8 күнүттэн локдаун күннэрэ түмүктэннилэр. Мантан инньэ хайдах быһыылаах-таһаалаах олох күүтэрий? Ханна, ханнык тэрилтэлэргэ QR куодунан (быһыы ылбытыгар эбэтэр ыалдьан аһарбытыгар олоҕуран), биитэр 72 чаастан уһуна суох ПЦР анаалыһынан, эбэтэр доруобуйатын туругунан медотвод ылан киириэххэ сөбүн туһунан салгыы ааҕыҥ:
-аралдьытар-атыылыыр кииннэргэ, атыы кииннэригэр, атыы комплекстарыгар;
- парикмахерскайдарга, кэрэ буолуу салоннарыгар, косметическай кииннэргэ, спа-кииннэргэ, массаас кэбиниэттэргэ;
- баанньыктарга, сауналарга, солярийдарга;
- турист уонна сынньалаҥ баазаларыгар;
- зоопаркаларга;
- хайыһар уларсар сирдэргэ, хайаттан хайыһардыыр пааркаларга;
- көмпүйүүтэр саалаларыгар;
- букмекерскай хонтуораларга, тотализатордарга уонна лоторея ыытар тэрилтэлэргэ;
- көстүүнэйдэргэ, хостелларга.
QR куода, ПЦР анаалыһа суох уонна көннөрү мэдиссиинэ ыспараапкатынан салгыы маннык тэрилтэлэргэ киирэр көҥүллэнэр:
-бородуукта маҕаһыыннарыгар;
-анал, бородуукта атыылыыр ырыынактарга-дьаармаркаларга, кууһунан-аҥаардастыы ас-үөл атыылыыр сирдэргэ;
- бородууксуйаны таһааран биэрэр атыы сирдэригэр;
- аһаҕас успорт былаһааккаларыгар, стадионнарга;
-эптиэкэлэргэ;
- олох-дьаһах өҥөтүн оҥорор сирдэргэ (химчисткаларга, таҥас-сап, атах таҥаһын өрөмүөннүүр сирдэргэ);
- cудаарыстыбыннай өҥөлөрү оҥорор тэрилтэлэргэ, бааннарга;
- сапыраапкаларга, автосервистарга, массыына сууйар сирдэргэ;
- бэтэринээр килииникэлэригэр.
Санатар эбит буоллахха, сэтинньи 8 күнүттэн хамсыгы утары быһыы туһунан сэртипикээт – официальнай докумуон таһымын ылла. Сымыйа сэртипикээт оҥостон туһаныыга накаастабыл кытаанах, биир сылга көҥүлү быһыыга тиийэ. Тус бэйэҥ QR куодун атын киһиэхэ уларсыы – административнай эппиэтинэс уонна 5 тыһ. ыстараабынан накаастанар. Накаастабыл туһаначчыга да, докумуон хаһаайыныгар да биир тэҥ.
QR куоду эбэтэр сэртипикээти көрдөрөргө бэйэҥ тус докумуоҥҥун (тус лиичинэскин бигэргэтэр) көрдөрөрүн булгуччулаах.
Ыалдьыбытын, эбэтэр быһыы ылбытын туһунан бигэргэтэр иһитиннэриини «Госуслуги» саайтан көрөн, QR куод ылыаххытын сөп.
