Ханнык баҕарар кэмҥэ норуот туруорсуута болҕомтоҕо ылыллар. Ол биир туоһута - Үөһээ Бүлүү Тамалакааныгар үйэлээх тимир атахха туруоруллубут уот ситимэ киирэн, үс уулусса күнүскүлүү сырдык уотунан хааччылынна. Онуоха “Олохтоох көҕүлээһини өйүөҕүҥ бырагыраамата” оруоллаах.
Кэҥэтэ түһэн кэпсээтэххэ, Тамалакаан дьоно-сэргэтэ бу бырагыраамаҕа төрдүс сылын кыттан, төрдүс төгүлүн баакка тигистилэр. Ол курдук, 2018 сыллаахха бырагырааманан гран ылан, ол үбүнэн сайыҥҥы уу ситимэ киирэн, хаһаайкалар оҕуруот олордуутугар, күннээҕи түбүккэ улаханнык абыраннылар. 2019, 2020 сылларга эмиэ ити бырагыраамаҕа кыттан, бөһүөлэк иһинээҕи буорунан бурҕайа сытар суоллар өрөмүөннэнэн, тырааныспарга да, сатыы да киһиэхэ табыгастаах буолла. Оттон быйыл, этиллибитин курдук, көрүллүбүт үбү сырдатыыга анаан, үс уулуссаҕа, барыта 3 килэмиэтиргэ чугаһыыр сиргэ, куораттыы тииптээх үрдүк тимир баҕаналар тураннар, бөһүөлэк иһэ сандаара түстэ.
Маннык бырагырааманан Үп министиэристибэтин “Бүтүн аан дойдутааҕы бааныттан” 1,5 м³л.солк. көрүллэн, онно дьаһалта бэйэтин үбүн эбэн, ону тэҥэ нэһилиэнньэ харчынан кыттыһан, үс өттүттэн көмөлөөн, баҕа санаа олоххо киирэр кыахтанар. Куонкуруска кыайыылааҕы талыы анал формуланан баалы хомуйуунан быһаарыллар. Онуоха ыытыллар тэрээһиннэргэ нэһилиэнньэ көхтөөх кыттыыта улахан оруоллаах.
Бу нэһилиэккэ былырыын доруобуйа харыстабылын федеральнай бырагырааматынан амбулатория тутуллубута. Быйыл Саҥа дьыл иннинэ оскуола-саат тутуллан, үлэҕэ киириэхтээх. Онон нэһилиэнньэ олоххо көхтөөх сыһыанынан олоҕун тупсарар, сыалын ситиһэр.
Бэйэ кэрр.