Саха учуонайдара оҥорон таһаарбыт саҥа хоруона вируһун эмтииргэ уонна сэрэтиигэ туһаныахтаах «Бетукладин» эмтэрэ судаарыстыбаннай бигэргэтиини ааста, бу туһунан «Якутский научный центр СО РАН» федеральнай чинчийэр киин пресс-сулууспата иһитиннэрэр.
Билиҥҥи кэмҥэ эмп хаҕын тас көрүҥэ оҥоһулла сылдьар, оттон бэйэтэ «атыыга сотору тахсыаҕа».
Бу биологическай, актыыбынай эбилиги криолитозона биологическай кыһалҕаларын үөрэтэр Үнүстүтүүт учуонайдара - биологическай наука дуоктара Борис Кершенгольц уонна биологическай наука хандьыдаата Михаил Шашурин оҥорбуттар.
Билиҥҥи туругунан «Бетукладин» клиническэй бэрэбиэркэ бары кэрдииһин ааспыт уонна бу хоруона вируһун эмтииргэ уонна сэрэтиигэ туһанарга көдьүүстээҕэ биллибит. Маҥнайгы уонна иккис кэрдиис бэрэбиэркэтэ өссө 2020 сыллаахха ааспыт эбит. Үһүс кэтээн көрөөһүн бу сайын буолбут.
«Биопрепарат коронавирустан сутуллууну аччатар уонна бу ыарыы ыарахан кэрчигин аһарарга уһунун уонна ыарахан буолуутун 45-53% кыччатар, СОVID-19 кэннэ чөлгө түһүүнү түргэтэтэр уонна чэпчэтэр. Маны таһынан, „Бетукладин“ бу куһаҕан ыарыы кэннэ сылайа сылдьар буолууттан уонна улахан санаа түһүүтүттэн көмөлөһөр», - диэн суруллубут.
Борис Кершенгольц этэринэн, «Бетукладин» эмп SARS-CoV-2 вирус мишень-килиэккэлэргэ толору тарҕаныытыгар хааччах буолар уонна вирус сутуйбут иммуннай систиэмэтин, хаан эргиирин, куһаҕан эттик эттэн-сиинтэн тахсыытын уонна да атын систиэмэлэрин этэҥҥэ актыыбынай буолууларын харыстыыр суолталаах.
Дьиҥинэн, бу эми төбүркүлүөс уонна В гепатит ыарыыларын бохсорго туттуллуохтаах эбит.
