Сэтинньи 16 күнүгэр, күнүс 11 чаастан «Zoome» онлайн былаһааккатыгар «Кыым» норуот хаһыата «Хамсык уонна тыа сирэ: тугу гыныахха?» диэн төгүрүк остуол тэрийэн ыытта. Тэрээһини модераторынан Саха Өрөспүүбүлүкэтин норуодунай дьокутаата Мария Николаевна Христофорова буолла.
Төгүрүк остуол бэбиэскэтэ маннык этэ:
1) СӨ сэлиэнньэлэригэр хоруона вируһун тарҕаныытын туруга.
- Иһитиннэрээччи: СӨ Роспотребнадзорун салалтата.
- Нэһилиэнньэттэн киирбит үҥсүүлэргэ-этиниилэргэ олоҕуран, тыа сиригэр доруобуйа харыстабылын туругун анаарыы - уопсастыбаннай эспиэр С.М. Оготоева тыл этиитэ.
2) Эмтээһин уонна хоруона кэннэ чөлүгэр түһэрии кыһалҕалара.
Иһитиннэрээччи: СӨ Доруобуйа харыстабылыгар министиэристибэтэ, СӨ Росздравнадзор олохтоох уоргана, мэдиссиинэ уонна страховка тэрилтэлэрэ.
3) Тыл этиитэ, дакылааччыттартан ыйытыы, түмүк таһаарыы.
Төгүрүк остуол түмүгүнэн резолюция ылыныллар.
«Хамсык уонна тыа сирэ: тугу гыныахха?» диэн төгүрүк остуолга хоруона вируһун хамсыгын бүгүҥҥү туругун тула кэпсэтии, маныаха сыһыаннаах элбэх сытыы боппуруостары ырытыы буолла, туһааннаах тэрилтэ эппиэтинэстээх дьонуттан ыйытык бэрилиннэ, хоруйдары иһиттибит. Маны таһынан, тыа дьонун тус санаатын, үөскээбит күчүмэҕэйдэри хайдах быһыылаахтык быһаарыахха сөбүн туһунан этиилэри истии буолла. Дьон төһөнөн элбэх даҕаны соччонон санаа эгэлгэтэ элбэх буолар дииллэр. Бу мунньахха төһө даҕаны үгүс тыл этилиннэр, сүнньэ биир буолла – хоруона хамсыгын сытыы кыһалҕатын тустаах тэрилтэлэр кэмигэр быһааран иһэллэрин хонтуруолга ылыы.
Билиҥҥи кэмҥэ биир сытыы, тыын боппуруоһу ырытар, быһаарар төгүрүк остуолга тустаах тэрилтэлэр, тыа сирин олохтоохторо, дьокутааттар, мэдиссиинэ тэрилтэлэрин бэрэстэбиитэллэрэ, уопсастыбанньыктар уо.д.а. кыттыыны ыллыллар: СӨ Ил Түмэнин дьокутааттара Вера Дмитриевна Никифорова, Андрей Михайлович Находкин, Михаил Ильич Эверстов, Андрей Юрьевич Николаев, Михаил Дмитриевич Гуляев; СӨ Доруобуйа харыстабылын Миниистирин солбуйааччы Любовь Степановна Бурнашева, бэрэстэбиитэл Айталина Константиновна Торонова; СӨ Роспотребнадзор салалтатын эпидемиологическай кэтэбилин салайааччыта Любовь Владимировна Будацыренова; ТФОМС генеральнай дириэктэрин солбуйааччы Николай Михайлович Постников; уопсастыбаннай эспиэр, Саха Кэнгириэһин чилиэнэ Семен Морович Оготоев; тыа хаһаайыстыбатын наукатын бэрэпиэссэрэ Константин Максимович Степанов; СӨ уопсастабыннай палаататын, доруобуйа харыстабылын хамыыһыйатын бэрэстэбиитэлэ, Дьокуускай куорат №3 балыыһатын кылаабынай бырааһа Светлана Николаевна Давыдова; Аллайыаха улууһун оройуоннааҕы дьокутааттар сэбиэттэрин бэрэссэдээтэлэ, инфекционист быраас Софья Лаврентьевна Александрова; Сунтаар оройуонун дьокутааттарын сүбэтин бэрэссэдээтэлэ Ульяна Дмитриевна Попова; Чурапчы оройуонун киин балыыһатын кылаабынай бырааһа Артем Михайлович Ксенофонтов; Өлөөн улууһун оройуоннааҕы сэбиэтин дьокутаата Марина Христофоровна Николаева; «Ситим» медиагруппа генеральнай дириэктэрэ Владимир Николаевич Степанов; сахалыы бикипиэдьийэни төрүттээччи, мэдиссиинэ билимин хандьыдаата Николай Николаевич Павлов- Халан уо.д.а.
Тыл этээччилэр биир үксүн тыа сиригэр-уотугар олорор дьоҥҥо-сэргэҕэ быһыыны ылыы, «Актемра» курдук ыарахан сыаналаах эмтэри норуокка тиксэрии, хоруона вируһун быһаарар анаалыстар кыһалҕаларын, тэйиччи нэһилиэнньэлэргэ мэдиссиинэ үлэһиттэрэ тиийбэттэрин, эми-тому ыарыһахтарга тириэрдии күчүмэҕэйдэрин, маныаха үп-харчы боппуруостарын ырыттылар. Чуолаан, Саха Өрөспүүбүлүкэтин Доруобуйаҕа харыстабылын Министиэристибэтигэр элбэх ыйытык киирдэ. Дьону үүйэ-хаайа тутар, тыа сиригэр чахчы баар кыһалҕалары быһаарарга кыһарыйтарбыттарын туһунан санаалар этилиннилэр. Түмүккэ, бүгүн тосхойбут боппуруостары, түмүктэри СӨ Ил Дарханыгар Айсен Сергеевич Николаевка суруйан тиксэрэр туһунан быһаарылынна. Онон, бүгүҥҥү тыҥааһыннаах кыһалҕалар бу төгүрүк остуолга эрэ ырытыллыбакка салҕыы быһаарыллыахтара.
