Сэтинньи 18 күнүгэр Арассыыйа бырабыытылыстыбатын бэрэссэдээтэлин солбуйааччы – Арассыыйа Уһук Илин уокуругар бэрэсидьиэн боломуочунай бэрэстэбиитэлэ Юрий Трутнев уонна Саха сирин аҕа баһылыга Айсен Николаев, Горнай улууһун Бэс Күөл нэһилиэгэр тахса сырыттылар, баһаартан ордук күүскэ эмсэҕэлээбит бөһүөлэк олохтоохторун кытта көрүстүлэр. Саҥа тутуллубут дьиэ-уот усулуобуйатын, хаачыстыбатын сыаналаатылар. Дьон санааларын билистилэр.
Юрий Трутнев олохтоохтору кытта көрсөн, кэпсэтэн баран маннык диэн эттэ: “Саамай кылаабынайа дьон-сэргэ тутууларынан астынна. Бэл, туох эмит кыра итэҕэс-быһаҕас баар дуо диэн ыйыппыппар, эдэр хаһаайка соһуйбуттуу эргиллэ биэрээт «Ама хайаан? Туох баар буолуой? Барыта орун оннугар лоп-бааччы», диэн хардаран үөртэ. Атырдьах ыйыгар биһиги манна күл-көмөр ортотугар турдахпытына, аны икки ыйынан тымныылар түһүөхтэрин иннинэ, итиччэ түргэнник ыгым кэмнэргэ бачча үчүгэй, элбэх дьиэни тутан дьэндэтэр олус уустук садаачча курдук этэ. Билигин мин көрөрбүнэн урукку турбут дьиэлэр оннуларыгар 34 сабыс-саҥа дьиэ туран киэркэйбит! Махтанабыт бу тутуулары үбүлээбит «Алроса» уонна «Роснефть» хампаанньаларга. Бөһүөлэк толору чөлүгэр түстэ диир кыахтаахпыт. Билигин манна өссө саҥа оскуола уонна сынньанар киин тутуллуохтаах. Онуоха, биһиги федеральнай кииҥҥэ үлэлиир кэллиэгэлэрбитин тиэтэтиэхпит, кинилэр бу үлэни кэмигэр толороллоругар. Улахан тымныылар түһэн эрэллэр. Дьон этэҥҥэ кыстыкка киирдилэр”.
Саха сирин аҕа баһылыга Айсен Николаев көрсүһүү кэнниттэн маннык диэн бэлиэтээтэ: «2022 сыллаах ойуур баһаардарын болдьоҕор биһиги билиҥҥиттэн бэлэмнэниэхтээхпит. Махтаныам этэ дойду бэрэссидьиэнигэр Владимир Путиҥҥа уонна Арассыыйа Уһук Илин уокуругар бэрэсидьиэн боломуочунай бэрэстэбиитэлэ Юрий Трутневка. Кинилэр быһаарыныылаах дьаһалларын түмүгэр биһиэхэ ойуур баһаардарын умулларыыга көрүллэр үп-харчы хас да төгүл улаатта. Билиҥҥиттэн биһиги саҥа тиэхинньикэ, сэп-сэбиргэл атыылаһан, авиадесант штатын хаҥатан кэлэр сыл баһаардарыгар эрдэттэн ох курдук оҥостон бэлэм сылдьыахтаахпыт. Хайыы-үйэ аны сааскыттан биһиги ойуур баһаардарын эрдэттэн бохсор, сэрэтэр киэҥ далааһыннаах кэккэ үлэлэри ыытыахтаахпыт. Сайын кураан түһэр кэмин, биһиги ойуур уотун утары туох баар күүстэри мунньан көрсүөхтээхпит».
