Бэрдьигэстээххэ «1000 тиэргэн» бырагырааманан Даниловтарга мини-парк тутуллуоҕа

Ахсынньы 2 күнүгэр, Бэрдьигэстээх дьаһалтатын аактабай саалатыгар ППМИ-га (олохтоох көҕүлээһиннэри өйүүр бырагыраама) кыттарга анаммыт мунньах буолла. Нэһилиэк баһылыгын солбуйааччы Ксения Васильева мунньах кыттыылаахтарыгар онлайн-куоластааһын түмүгүн билиһиннэрдэ. Мунньахха нэһилиэнньэттэн киирбит бырайыактары бигэргэттилэр, ППМИ бэриллиэхтээх бырайыактары кытта үлэлэһэр көҕүлүүр бөлөҕү таллылар. "1000 тиэргэн" диэн федеральнай бырагыраамаҕа кыттарга анаан сири быһаардылар.

Ксения Васильева, "Бэрдьигэстээх нэһилиэгэ" МТ баһылыгын солбуйааччыта:

- Сэтинньи 15 - 26 күннэргэ ыытыллыбыт онлайн куоластааһыҥҥа барыта 11 бырайыак киирбититтэн, түөрт бырайыак элбэх куолаһы ылан талыллыбыта. Ол курдук, федеральнай трассаттан ПМК-ҕа туоруур суол оҥоруута, "Чэбдик" түөлбэҕэ оҕо былаһааккатын тутуу, сэлиэнньэни баһаартан харыстыыр инниттэн уу таһар тиэхиникэ уонна Сэмэн, Софрон Даниловтарга сквер оҥоруута. Маны таһынан, бу сквер "1000 тиэргэн" диэн федеральнай бырагыраамаҕа улуус аатыттан кыттыаҕа. Олохтоох көҕүлээһини өйүүр бырагыраама көмөтүнэн ыытыллыбыт тэрээһиҥҥэ барыта 1089 киһи куоластаата.

Анатолий Люфа:

- Быйылгы баһаардар улахан кыамталаах, анал тиэхиникэ өттүнэн хааччыллыыбыт мөлтөҕүн арылхайдык көрдөрдө. Ыксаллаах быһыы-майгы үөскүүр (баһаар, халаан уо.д.а.) кэмигэр анал эрэ тиэхиникэлээх буоллаххына боппуруос тутатына быһаарылла охсор. Инньэ гынан биһиги уу тиэйэр тиэхиникэни ыларга этии киллэрбиппитин нэһилиэнньэ үгүс өттө өйөөтө. Салгыы бырайыагы аһардар сыалтан көҕүлүүр бөлөх тэриннибит.

Яна Петрова:

- Уһук Илин федеральнай уокурук иһинэн "1000 тиэргэн" диэн федеральнай бырайыак ыытыллар. Биһиги бу бырайыакка Сэмэн, Софрон Даниловтарга аналлаах мини-парк бырайыагын киллэрдибит. Паркабыт инникитин кинигэ атыылыыр лааппылаах, ааҕар, сынньанар анал сирдээх буолуоҕа. Биир уратытынан, доруобуйаларынан хааччахтаах дьон сылдьарыгар анаан былааннанан оҥоһуллуоҕа. Сэмэн, Софрон Даниловтарга ананан оҥоһуллубут памятник көһөрүллэн туруоруллуоҕа.

Руслан Семенов:

- Быйылгы ППМИ бырагыраамаҕа "Маатта" түөлбэттэн, элбэх куолаһы ылан, федеральнай суолтан «Махтал» маҕаһыын иннинэн ааһар уулуссабыт суолун өрөмүөннээһинэ киирдэ. Бу бырагыраама тыа сиригэр олорор дьоҥҥо, бэйэлэрин түөлбэлэрин сайыннаралларыгар, олохтоохтор көҕүлээһиннэрин олоххо килэрэллэригэр уонна биир санааннан түмсэн үлэлииллэригэр олус туһалаах. Бу толкуйдаммыт бырайыакка нэһилиэнньэ бэйэтин кылаатын киллэриитэ олус суолталаах, кэскиллээх.