Олохтоохтор кыстыгы баттаһа саҥа дьиэҕэ киирбиттэриттэн үөрэллэр

Ил Дархан Айсен Николаев Анал этиитигэр ойуур баһаардарын боппуруоһугар чопчу тохтоон, кэлэр өттүгэр сөптөөх үлэни ыытарга этии киллэрдэ. Бэс Күөл сэлиэнньэтигэр ойуур баһаарыттан тахсыбыт быһылаан иэдээнэ хатыламматын туһуттан үлэни күүһүрдэргэ ыҥырда. Ойуур баһаарын куттала суоһаабыт кэмигэр Горнайтан дьиэ-уот коммунальнай хаһаайыстыбатын оператора Спиридон Яковлев хорсун быһыытын, Кировскай нэһилиэгин баһылыга Савва Данилов, Маҥаныттан бааһынай хаһаайыстыба салайааччыта Аркадий Васильев сөптөөх, тэрээһиннээх үлэни ыыппыттарын бэлиэтээтэ.

Никита Андреев, Горнай улууһун баһылыга:

— Ил Дархан сыллааҕы Анал этиитигэр ойуур баһаардарыгар, умайбыт сирдэри чөлүгэр түһэриигэ

улахан болҕомто ууруллар буолбутун тоһоҕолоон бэлиэтээтэбитин бары даҕаны сэргии иһиттибит. Манна баһаары утары үлэлэһэр тэрилтэлэргэ штатнай элбээһинэ, хамнас үрдээһинэ бу ойуур баһаарын эрдэтинэ сэрэтиигэ, умулларыыга, кэтээһиҥҥэ улахан суолталаах буолуоҕа. Холобур, биһиги улууспутугар «Авиалесоохрана», «Якутлесресурс» тэрилтэлэр уончалыы үлэһиттээхтэр. Улууспутугар штатнай единица элбиэ диэн эрэнэбит.

Бэс Күөл олохтоохторо РФ Президенигэр Владимир Путиҥҥа, Ил Дархаҥҥа Айсен Николаевка, СӨ Бырабыыталыстыбатыгар махталларын тириэрдэллэр. Ону тэҥэ «Роснефть», «Алроса», «Полюс-Холода» хампаанньалара улахан көмөнү оҥордулар. Россия, өрөспүүбүлүкэ бары олохтоохторо, тас дойдуга олорор биир дойдулаахтарбыт Бэс Күөлүгэр тахсыбыт иэдээни сүрэхтэригэр чугастык ылынан, туора турбакка бэйэлэрин көмөлөрүн оҥорбуттарын үрдүктүк сыаналыыбыт уонна махтанабыт.

Кылгас кэм иһигэр Бэс Күөлүн чөлүгэр түһэриигэ өрөспүүбүлүкэбит биэдэмистибэлэрэ, министиэристибэлэр күүстээхтик үлэлээтилэр. Олохтоохтор кыстыгы баттаһа саҥа дьиэҕэ киирбиттэриттэн үөрэллэр. Инникитин дойдубут Президенэ Владимир Путин салалтатынан социальнай объектар үлэҕэ киириэхтэрэ. Барыта ситтэҕинэ-хоттоҕуна Бэс Күөлэ биир үчүгэй балаһыанньалаах, ураты көстүүлээх бастыҥ сэлиэнньэ буолуоҕа.

Күннэй Алексеева

Сигэтэ: https://xn----7sbbprs1bdnl.xn--p1ai/article/34555