2021 сылга үктэнэн баран, Саха сиригэр 11 000 оҕо төрөөтө. Кырачаан киһи Сунтаар улууһун Бордоҥ бөһүөлэгин олохтоохторо Ноев-Евсеевтэр дьиэ кэргэннэригэр күн сирин көрбүт. Нарыйаана диэн сүрэхтэммит.
Бу бэлиэ түгэнинэн уонна Дьиэ кэргэн күнүнэн сибээстээн, нэһилиэк култууратын киинигэр дьоро тэрээһин буолла. Манна эдэр ыаллары эҕэрдэлээбиттэрин таһынан, Дьоруой ийэлэри чиэстээбиттэр.
Кырачаан Нарыйаана төрөппүттэригэр – Елизавета уонна Александр Ноев-Евсеевтэргэ улуус социальнай харалтаҕа управлениетын салайааччыта Михаил Тимофеев кыыс Саха сиригэр быйыл 11-с тыһыынча оҕонон төрөөбүтүн туоһулуур СӨ Үлэҕэ уонна социальнай сайдыыга министиэристибэтин сибидиэтэлистибэтин туттарбыт.
Бу туһунан министиэристибэ пресс-сулууспата суруйар.
