Дьокуускай куорат дьаһалтатын пресс-сулууспата иһитиннэрэринэн, быстах кэмҥэ үлэлэриттэн тохтотулуннулар: Куораты дьаһайар хаһаайыстыба сулууспатын салайааччыта Айаал Егинов уонна Автодорожнай уокурук баһылыга Александр Иванов.
Иһитиннэриигэ чопчуланарынан: "Бу уокурук иһинээҕи сулууспа бэрэбиэркэтэ, холуобунай дьыалалары кытта туох да ситимэ суох".
Суруналыыстар субуоннаабыттарыгар, Александр Иванов хоруй биэрэртэн аккаастанна, Айаал Егинов туруупкатын ылбата.
Ахсынньы 29 күнүгэрр, Ипподромҥа тахсыбыт алдьархай кэнниттэн, Дьокуускай куоракка дьэллик ыттары тутуу үлэтэ күүһүрдэ, итиэннэ эбии килиэккэлэр оҥоһулуннулар. Ол күн ыттар СВФУ доцена Сардаана Слепцоваҕа саба түһэн суорума суоллаабыттара. Өлүгү, бу быһылаан кэнниттэн ити суолунан баран испит устудьуон булбута. Буолбут түбэлтэ түмүгүнэн икки холуобунай дьыала көбүтүлүннэ.
Ол күнтэн ылата Автодорожнай уокурукка куорат былаастара Ураты бэлэмнээх буолуу эрэсиимин киллэрбиттэрэ. Ахсынньы 30 күнүгэр сарсыардаттан 11 эбии ыт тутар биригээдэ тэриллибитэ. Хас биирдии бэйэлэригэр кинолог уонна быстах харайар пуунтан ыты тутар исписэлиис үлэлииллэр.
Ону таһынан уокурук иһигэр, 320 ыты быстах кэмҥэ харайар аналлаах пуун тутуллан эрэр.