Өрөспүүбүлүкэҕэ хамсык балаһыанньата хат сытыырхайбытынан сибээстээн, ураты бэлэмнээх буолуу эрэсиимэ уонна хааччахтааһын миэрэтэ 2022 сыл кулун тутар 1 күнүгэр диэри уһаата. Ол туһунан уураахха Ил Дархан бүгүн илии баттаата.
Эрдэ биллэриллибитинэн, тохсунньу 12 күнүгэр, Дьокуускай куоракка “омикрон” штаммынан ыалдьыы бастакы түбэлтэтэ бэлиэтэммитэ. 2022 сыл, тохсунньу 14 күннээҕи туругунан, өрөспүүбүлүкэ үрдүнэн уруккуттан баар COVID-19 ыарыынан 210 киһи ыарыйда, онтон Дьокуускайга – 150 түбэлтэ. Хамсык балаһыанньата хат мөлтөөбүтүнэн сибээстээн, Дьокуускай куоракка сарсыҥҥыттан, тохсунньу 15 күнүттэн, сокуоннай саастарын сиппит гражданнартан атыылыыр-аралдьытар кииннэргэ киирэллэригэр QR куод эбэтэр отрицательнай түмүктээх ПЦР ирдиир буолуохтара.
Оройуоннарга баар атыы-тутуу кииннэригэр киирэргэ QR куод ирдэбилин киллэриини олохтоох суһал ыстааптар бэйэлэрэ миэстэтигэр быһаарар буолуохтара.
Уопсастыбыннай аһылык тэрилтэлэрин үлэлиир эрэсиимнэрэ сарсыарда алта чаастан түүн уон иккигэ диэри үлэлиэхтэрэ.
Уураахха сурулларынан, уоппускаларын кэмигэр тас дойдуттан кэлбит үлэһиттэр үлэҕэ тахсалларыгар, 72 чаастан кырата суох ПЦР эбэтэр ИХА тиэстин тиксэрэллэрэ булгуччулаах. Маннык быһаарыы быһыы ылбыт эбэтэр бүтэһик алта ый иһигэр ыалдьан ааспыт дьону эмиэ таарыйар.
Хамсыгынан ыалдьыбыт киһилиин ыкса алтыспыт, эбэтэр тас дойдуттан кэлбит дьон, 14 күн устата бэйэни харыстаныы эрэсиимин булгуччу тутуһаллара ирдэнэр.
Үлэлиир гражданнар, бэйэни харыстаныы эрэсиимигэр баралларын туһунан хайаан да салалталарыгар биллэриэхтээхтэр. Оттон салалта бэйэтин өттүттэн үлэһит маннык эрэсиимҥэ барарын хааччыйыахтаах, ыраахтан олорон үлэлиир эрэсиимҥэ көһөрүөхтээх. Оннук миэрэ кыаллыбат буоллаҕына, салалта бэйэтин үлэһиттэригэр сыллата көрүллэр уоппускаларын биэриэхтээх, эбэтэр үлэ сокуонун кодексын барытын тутуһан туран, үлэһит бэйэтин суотугар төлөммөт уоппускаҕа барарын тэрийсиэхтээх, .
Ил Дархан уонна Саха Өрөспүүбүлүкэтин бырабыытылыстыбатын пресс-сулууспата
