Кириһиэнньэ бырааһынньыгын көрсө, Саха сиригэр чардаакка умсуу саҕаланна. Тохсунньу 18 күнүгэр, Күөх Хонуу хомотугар өрөспүүбүлүкэ киин чаардаата арылынна.
Сибэтиэй ууга сөтүөлүөн баҕалаахтары уоан муус оҥоһук көрсөр. Киирээччилэртэн суумкаларын бэрэбиэркэлииллэр.
Балаакка үс аҥы хайдыһар. Эр дьон, дьахтар уонна киин эркиннэргэ. Сылааһынан үрэр оһохтор итиини хааччыйаллар. Салгыны ыраастыыр рециркулятордар үлэлии тураллар. Муостатыгар хаптаһын тэлгэммит.
Бастакынан чардаакка Ил Дархан умуста. Кини суруналыыстары кытта санаатын үллэһиннэ: "Сыллааҕы сылаам барыта таҕыста. Мин итэҕэллээх киһи быһыытынан, үгүс сыл тухары кириһиэнньэ чардаатыгар умсар үгэстээхпин. Сырдык, ыраас иэйиинэн туолабын. Инникитин элбэх ыйга сэрээт ылабын. Миэхэ үгүс итэҕэлээх дьон көрдөһүүлээх тахсыбыттара. Бачча хара хамсык уонна да атын араас кыһалҕа саба бүрүкээн турар уустук кэмигэр, биһиги бигэ итэҕэллээхпитин көрдөрүөхтээхпит, диэн. Ол да буоллар, биһиги манна чахчы чэгиэн туруктаах дьон кэлэн чардаакка сылдьалларыгар сүбэлиибит. Биллэн турар туох баар саньытаарынай ирдэбиллэри уонна социальнай арыты тутуһан туран".
Сибэтиэй ууну ылар уонна ууга умсар чардааттар Саха сирин үгүс улуустарыгар көҥүллэннилэр.
Балааккалар тастарыгар ИДЬМ, Быыһыыр Сулууспа уонна Суһал Көмө үлэһиттэрэ төгүрүк суукканы быһа дьуһуурустубалыахтара.
Чардаакка тиийиэн баҕалаахтарга анаан Дьокуускай куоракка оптуобус сылдьыаҕа. "Вечный Огонь" искибиэриттэн Күөх Хонуу хомотугар диэри. Тохсунньу 19 күнүгэр сарсыарда аҕыстан киэһэ аҕыска диэри. Айан иһин төлөбүр сыаната - 33 солк.
