Тэрээhин 4 улахан блогунан барда. Олохтоохтор былырыыңңы отчуоту сэргээбит саңа форматтара быйыл эмиэ туттулунна, ситэриллэн, кэҥээн биэрдэ.
Куорат баhылыгын иhитиннэриитэ Ньурбаҕа 2021 сылга ыытыллыбыт үлэлэр хаартыскаларынан, сыыппараларынан бигэргэнэн, дьон болҕомтотун тарта. Александр Игнатьевич хас биирдии ыытыллыбыт үлэ ис хоhоонун, суолтатын быhааран кэпсээбитин истээччилэр чугастык ылыннылар.
Куорат баhылыгын иhитиннэриитин биир чаҕылхай ѳрүтүнэн уонна уратытынан Ньурба куорат 2030 сылга диэри сайдыытын концепциятын сырдатыы буолла. Былааннаммыт үлэлэр, бырайыактар тиhэх кѳстүүлэрин визуализацията тэрээhин кыттааччыларын даҕаны, быhа эфирынан да кѳрѳѳччүлэри күүскэ долгутта уонна соhутта. Куораппыт саңалыы кѳстүүтэ арылхайдык аhыллан, үгүс киhи сүргэтин кѳтѳхтѳ.
Тэрээhин иккис долгутуулаах чааhыгар Ньурба куорат сайдыытыгар дьоhун кылааты киллэрсибит биир дойдулаахтарбытын чиэстээhин ыытылынна. Манна биирдиилээн дьону уонна бѳлѳхтѳрү наҕараадалааhын буолла. «Ньурба куоратын социальнай-экономическай сайдыытыгар кылаатын иhин» бочуот бэлиэлэрэ уонна ааспыт сылга оноhуллубут үтүѳ дьыалаларга анал номинациялар туттарылыннылар.
Салгыы Ньурба куорат тэрилтэлэрин икки ардыларыгар ыытыллыбыт «Тыыннаах куорат» культурнай-спортивнай фестиваль кыттыылаахтарын, кыайыылаахтарын чиэстээhин буолла. Үлэ кэллэктииптэрин сомоҕолуур, куорат ааспыт сыллааҕы олоҕун биир чаҕылхай тэрээhинин муңутуур кыайыылааҕынан СѲ олох-дьаhах коммунальнай хаhаайыстыбатын Ньурбатааҕы филиалын кэлэктиибэ буолла. Куорат баhылыга кинилэргэ 500 тыh. солк. сэртипикээти үѳрүүлээх быhыыга-майгыга туттарда.
Ааспыт сылы түмүктүүр «Итоги. Перспективы» үгэс буолбут тэрээhиңңэ баhылык Александр Иванов кэлбит 2022 үбүлүѳйдээх сылы Ньурба куоракка Ньурба патриотын Сылынан биллэрдэ. Бу сыл куораппыт 25 сыллаах үбүлүѳйүгэр анаммыт былааннар олоххо киириилэрин уонна инники кэскили кэрэhэлиир сылынан буолуоҕа.
Ньурба куорат пресс-киинэ
