Суукка иһигэр өрөспүүбүлүкэ лабаратыарыйаларыгар 8786 саҥа хоруона вируһун булууга чинчийии буолбут. Хамсык саҕаланыаҕыттан 1 907 196 тиэст оҥоһуллубут.
Ордук элбэх ыалдьыбыт киһи ахсаана Дьокуускай куораппытыгар баар – 1491.
Төһө даҕаны ыарыыбыт сындыыс сулустуу түргэнник тарҕаннар, элбэх киһи ыарыыны чэпчэкитик аһарына сылдьар. Кэтээн көрүү түмүгүнэн, быһыыны ылбыт дьон күүскэ ыалдьыбат эбит.
stopcovid19.sakha.gov.ru саайт көрдөрөрүнэн, Дьокуускай куоракка СOVID-19 ыалдьыбыт 1811 киһи балыыһаҕа сытан эмтэнэр.
Бэҕэһээ, быһа эпииргэ, Ил Дархан балыыһаҕа уонна «Өрөгөй» спорткомплекс дьиэтигэр арыллыбыт амбулатория киинигэр, тымныйыы сибикилээх киһи босхо ковид тиэстин туттарыан сөбүн туһунан эппитэ. Манна дьону тохсунньу 27 күнүттэн күнүс 14.00 чаастан көрүөхтэрэ, онтон сарсыҥҥаттан сарсыарда 8.00 ч. киэһэ 20.00 ч. диэри икки симиэнэнэн үлэлиэхтэрэ.
