Лена Афанасьева: «Триумфка» көрдөрбүт дьон  40 % - на   ыалдьыбыт сибикитэ суох

Киин куоракка быраас үксээбит үлэтин үмүрүтэр, ыалдьыбыт дьону түргэнник быһаарар уонна эмтиир туһугар «Триумф» успуорт комплексыгар Ил Дархан Айсен Николаев дьаһалынан суһал амбулаторнай көмөнү оҥорор киин тэриллибитэ.

Онуоха доруобай эрээри, босхо анаалыс туттараары кэлбит дьон, ыалдьыбыт дьон ахсааныгар эбиискэ буоланнар уһун уочарат үөскээн, «Триумф» суһал амбулаторнай көмөнү оҥорор киинэ кылгас кэмҥэ үлэтин тохтотто. Дьиҥэр, манна ыалдьыбыт сибикилээх эрэ дьон кэлиэхтээх этилэр.

СӨ Доруобуйа харыстабылын миниистирэ Лена Афанасьева амбулаторнай киин тохсунньу 27-с күнүгэр киэһэ 6 чааска, ол эбэтэр биир күн иһигэр, номнуо 2300 киһини көрбүтүн, олортон 40%-нара ИХА-тест туттаран көннөрү бэрэбиэркэлэнэ кэлбиттэрин туһунан иһитиннэрдэ.  

Кини бу кииҥҥэ чахчы ОРВИ-нан ыалдьыбыт сибикилээх эрэ дьон тиийэн көрдөрүөхтээхтэрин тоһоҕолоон эттэ. Оттон тыынарыгар ыарырҕатар, аҕылыыр,  38°С үрдүк температуралаах , кыаммат дьон дьиэҕэ быраас эбэтэр суһал көмө биригээдэтин ыҥырара ордук диэтэ. Доруобай киһи, итиннэ тиийэн ыалдьыбыттар ортолоругар сылдьан, бэйэтигэр эбии кутталы үөскэппэтигэр көрдөстө.

«Триумф» суһал амбулаторнай көмөнү оҥорор киинэ үлэтин салгыыр былааннаах.  Онон ыалдьан ыксаабыт дьон, куттаммат буоллаххытына, күн ахсын сарсыарда 8 чаастан киэһэ 8 чааска диэри кэмҥэ тиийэн көрдөрүөххүтүн сөп.