Саха сирин суһал ыстаабын киинэ иһитиннэрэринэн, тохсунньу 31 күнүнээҕи туругунан, саҥа хоруона вируһунан 2623 сутуллуу баара билиннэ. Бу – хамсык саҕаланыаҕыттан хаһааҥҥытааҕар даҕаны өссө биир муҥутуур элбэх көрдөрүү! Бу иннинээҕи күн 2506 этэ. Дьокуускайга 1819 киһи ыалдьыбыт. Оройуоннартан муҥутуур элбэх көрдөрүүлээҕинэн Мэҥэ Хаҥалас буолла, манна 234 киһи сутуллубутун быһаардылар.
Төһө даҕаны ыарыыбыт сындыыс сулустуу түргэнник тарҕаннар, элбэх киһи ыарыыны чэпчэкитик аһарына сылдьар диэн быраастар этэллэр. Бу быһыыны ылыы үтүө түмүгэ диэн бэлиэтииллэр.
Суукка иһигэр өрөспүүбүлүкэҕэ 1107 киһи үтүөрбүт, бу иннинээҕи күн 860 киһи чөлүгэр түспүтэ.
Өрөспүүбүлүкэтээҕи суһал ыстаап киинэ быһыыны бастаан уонна хаттаан булгуччу ылар ордук диэн сүбэлиир, тоҕо диэтэххэ, быһыы ыарыыны кытта охсуһарга ордук табыгастаах ньыманан буолар.
