Мииринэйгэ дьэллик ыттар бөлөҕүнэн сылдьаллар. Хас түүн аайы таас дьиэлэр анныларынааҕы ититии утума ааһар сиригэр иттэллэр, хоноллор. Сарсыарда эрдэ, биир эмит «буруйдаммыт табаарыстарын» тырыта тыытан, «ар-бур», «ньуу-ньаа», «оҥ-оҥ» бөҕөтө буолааччылар. Дьиэ олохтоохторун, «будильник» курдук уһугуннараллар.
Үс-түөрт ыт кэбилэнэр диэбитиҥ, кырата алта-сэттэ ыттаах үөр буолааччы. Киитэрэй анаҕастаахтар, нөҥүө түүнүгэр, урукку сирдэригэр ордууламматтар, атын сири булаллар. Мантан сылтаан, биир эмит киһи үҥүстэҕинэ, ыттары кыайан туппаттар. Аны туран, бэйдиэ сылдьар ыттары аһыныгас дьон, чуолаан дьахтар-аймах куруук аһата сылдьар. Халбаһыынан уонна гречканан үссэммит, тот, дохсун ыттар киһиттэн төрүт куттамматтар. Сөбүлээбэтэх, сэнээбит дьонноругар ырдьыгыныыллар, саба түһээри ойуоккалыыллар. Ордук чуолаан кыра оҕолорго олус кутталлаахтар.
Мииринэй олохтоохторо үгүстэрэ массыыналаах буоланнар, такси сыаната даҕаны удамыр буолан, оҕолорун сатыы сырытыннарбаттар. Оттон куорат кытыыларыгар ыт баһаам. Билигин, ыкка ытыттарар куттал куруук баар.
Бэйдиэ сылдьар ыттар Заречнай ойууругар сүүрэр, хайыһардыыр, бэлэсэпиэттиир дьоҥҥо саба түһүүлэрэ бэлиэтэммитэ. Спортсменнары ытыртбыт түбэлтэлэрэ баар. Даачаларга барарга эмиэ биир эрэй.
Бэйдиэ сылдьар ыттары уодьуганныыр, быстах кэмҥэ тутар пууннарга хомуйар сулууспа биһиэхэ сайдыбатах. Ханна да үҥсэн туһа суох. Муҥ саатар, эппиэттээх сирэйдэр төлөпүөнү сүгүн ылбат идэлээхтэр.
Билигин, ыттары быстах кэмҥэ тутар пууҥҥа үлэһиттэри көрдүүллэр. Үлэлиэн сөптөөх, үчүгэй ньиэрбэлээх дьону көрдөөбүттэрэ ыраатта.
Станислав Алексеев. Мииринэй куората.
