Былырыыҥҥы кэми кытта тэҥнээн көрдөххө, ынах сүөҺү ахсаана 31 төбөнөн элбээбит (107,1%), оттон сылгы 64 (107%). ХаҺаайыстыбалаахтар сыл түмүгүнэн 100 туонна эт, 398,9 туонна үүт оҥорон таҺаардылар. От саппааҺа 60% тэҥнэҺэр.
Өрөспүүбүлүкэбит үрдүкү салайааччыта Айсен Николаев норуот дьокутааттарыгар Анал этиитигэр урут хаҺан да көрүллүбэтэх үтүмэн үбү тыа хаҺаайыстыбатын сайдыытыгар көрүөхпүт диэн этиитин үгүс дьон сэҥээрбитэ. Ол курдук, 2022 сылга тыа хаҺаайыстыбатын сайдыытыгар 12,5 млрд солк., ол иҺигэр өрөспүүбүлүкэ бүддьүөтүттэн 11,9 млрд солк, федеральнай бүддьүөттэн 646 мөл. солк. көрүлүннэ.
Арктика улуустарыгар тыа хаҺаайыстыбатын производствотын өйөөҺүҥҥэ государственнай бюджеттан 1 ынахха 45 тыҺ. солк., 1 биэҕэ 3 тыҺ. солк. субвенция көрүлүннэ. Бэлиэтээн эттэххэ, урукку сыллартан биэҕэ балтараалыы, ынахха 35 тыҺыынчаны хаҺаайыстыбалар ылан кэлбиттэрэ. Улаатыннарыллыбыт көмө үп сылгы, ынах сүөҺү иитиитигэр төҺүү күүс буолуо диэн эрэнэбит.
Биллэрин курдук, ынах сүөҺү, сылгы иитиитэ үгүс үбү ирдиир. Маны учуоттаан, улуус бюджетыттан 450 тыҺ. солкуобай тыырылынна. Тыа
хаҺаайыстыбатын сайдыытыгар диэн нэҺилиэк дьаҺалталара бэйэлэрин бюджеттарыгар эмиэ үп көрдүлэр.
Ил Дархаммыт, Бырабыыталыстыбабыт тыа хаҺаайыстыбатын сайдыытыгар, дьон кыҺалҕатын быҺаччы быҺаарыыга, тыа хаҺаайыстыбатынан дьарыктанар дьон дохуоттаах буолууларыгар көмөнү улаатыннарыылара үөрдэр эрэ.
Александра Заровняева
Ылыллыбыт сигэтэ: https://xn--c1aogfugbl4da.xn--p1ai/article/40166
