Мииринэйгэ «Иирэлээх» нефть тэрилтэтигэр үлэһиттэр ирдэнэллэр

Үүммүт 2022 сыл бастакы ыйдарыгар, Мииринэйдээҕи үлэ “баанын” баһыйар бырыhыанын бырамыысаланнас тэрилтэлэрэ тосхотоллор.

Нефть хостуур «Иирэлээх» ХЭТ маннык хабааннаах үлэлэргэ ыҥырар:

Повар – 105.000 солк(баахта. 30 күн үлэ, 30- сынньалаҥ).
Эколог – 114 тыһыынча 943 солк.
Кылаабынай мэхээнньиги солбуйааччы – 125.063 солк.
Нефть уматыгын бэлэмниир тэриэбэ салайааччыта – 107.000, 194 тыһыынча солк (Баахта. 30/30).

Баахта биир ыйыгар 194 тыһыынча солк төлөнөн баран, сынньалаҥ ыйыгар харчы көрүллэр дуо диэн ыйыталаһыахха наада. Таксинан айан кэлэр-барар төлөбүрэ, холобур, Дьокуускайтан Мииринэйгэ диэри толуйуллар дуо диэн быһаарсар ордук.

Хиимийэ-анаалыстыыр лабаратыарыйа начаалынньыгын солбуйааччы (сылаас миэстэ) – 91 тыһыынча 956 солк.
Химик-лаборант (сылаас миэстэ) – 133 тыһыынча 995 солк (баахта. 30/30 күн).

Бу үөһэ ааттаабыт үлэлэрим син бэрт хамнастаахтар.

Оттон силиэсэрдэр, эпэрээтэрдэр хамнастара (баахта буолбатах, бастайааннай) – ортотунан 51-56 тыһыынча солк. Сэмэй хамнас.

«Иирэлээх» ХЭТ Мииринэй куоратыттан чугас сытар. Нефтяниктар богуончуктарга олороллор. Итии-тымныы уу, дуус, туалет, интернет, мобильнай сибээс баар. Өскөтүн туох эрэ биричиинэнэн, мин ааттаабыт тэрилтэбин ылымматах буоллаххытына, нефть-гаас тула үлэлиир атын, «Роснефть», «РНГ» тэрилтэлэр бааллар. Олору ыйыталаһыаххытын сөп.

Бүлүү Кыһыл-Сыырыттан, гааска сыһыаннаах испэсэлиис арааһа, Мииринэйгэ үлэлии көһөллөрө үксээн иһэр. Ол эрэ буолуо дуо?! Жатайдар, кирзаводтар бөлөҕүнэн кэлэллэр. Баахта ньыматынан үлэлииллэр. Бука, хамнас ордук өлгөмүн баттаспыттара чуолкай.

Оттон, ниэп-гаас тэрилтэлэригэр автокыраан машинистара, монтажниктар, элиэктириктэр, суоппардар, гааска сыhыаннаах силиэсэрдэр, сыбаарсыктар ирдэнэллэрин туһунан урут суруйан турабын. Нефть-гаас салаатыгар үлэ элбии турар. Онно үлэлиэн баҕалаахтар, бэйэҕитигэр табыгастаах усулуобайаны кэпсэтиэххитин наада.

Суоппар, электрик, мэхээнньик, слесарь буоллаххытына Мииринэйгэ тутахсыйыаххыт суоҕа. Баахтаны болҕойуҥ. Сорох тэрилтэлэр баахта кэнниттэн сынньалаҥ кэмигэр эмиэ төлүүллэр. Ол эрээри – бу маннык бойом эриэккэс.

Дьокуускайтан Мииринэй суолунан сырыы-айан муус устар ортотуттан бэс ыйын саҥатыгар диэри, алтынньы ый ортотуттан сэтинньи ый ортотугар диэри суох. Ону учуоттааҥ.

Бу чахчылары суруйарбар олохтоох «Мирок-биз» саайт иһитиннэриилэрин туһанным.