Киир

Киир

Чурапчыга, итии ситимин турбатын чөлүгэр түһэрэр үлэни ыыта сылдьаллар. Бу теплотрасса эргэ гимназия хочуолунайын истиэнэтэ сууллубутуттан сылтаан, алдьаммыт. Сууллуу түмүгэр, биир да киһи эчэйбэтэ, ол эрээри, арҕаа эҥэр турар 100 дьиэ итиитэ суох хаалбыт.

Түүн, саахалы туоратар сулууспа үлэһиттэрэ түргэнник туттан-хаптан, сууллубут буому ыраастаатылар. Ыксаллаах быһыыны-майгыны сэрэтэр, суох оҥорор уонна баһаартан куттал суох буолуутун хааччыйар хамыыһыйа мунньаҕар, саахалы туоратыыга суһал ыстаабы тэрийэр туһунан быһаарыныы ылылынна.

Оройуон салалтата нэһилиэнньэ кылгас кэмҥэ олохсуйарыгар анаан, А.И. Федотов аатынан Многофункциональнай успуорт комплексыгар быстах пууну тэрийдэ, «Айылгы» култуура киинин дьиэтигэр СOVID-19 ыалдьыбыттарга туспа миэстэни анаата. Маны сэргэ, быстах пууннарга олохсуйбут дьону итии аһынан-үөлүнэн, оттон доруобуйаларынан хааччахтаах дьону тырааныспарынан хааччыйда.

Нэһилиэк салалтатын үлэһиттэрэ, көмө оҥорор соруктаах, социальнай көмүскэлэ суох нэһилиэнньэ араҥатын уонна итиитэ суох хаалбыт олохтоохтор дьиэлэрин-уоттарын көрүү-истии үлэтин ыыталлар.

Чурапчы сэлиэнньэтигэр сыбаарсыктары, улахан массыыналаах суоппардары мунньаллар, чааһынай дьиэлэргэ чөлүгэр түһэрии үлэтин ыытарга анал биригээдэ уонна олбуордары кэрийэ сылдьан уопсай хоромньуну быһаарар хамыыһыйа тэрилиннилэр.

Сантехника матырыйаалларын атыылыыр бары маҕаһыыннар арыллан үлэлии тураллар.

Билигин теплотрассаны сыбааркалыыр үлэ ыытылла турар.

Чурапчы улууһун салалтатын пресс-сулууспата

Тарҕат:

Санааҕын суруй