санаолох.рф Чурапчы улууһун саайтыгар суруллубутунан, Чурапчыга өрөспүүбүлүкэҕэ бастакынан бөҕү наардыыр комплекс тутуллуохтаах.
Бу туһунан улуус баһылыга Степан Саргыдаев “Экосистемы Якутии” ХЭТ салалтатын кытта кэпсэттэ.
Билиҥҥи туругунан, улуус дьаһалтата бары билэр “бөхпүт алааһыгар” кырата 1 га сири бу комплекс тутуутугар аныахтаах. Оччоҕо “Ленапроект” ХЭТ бырайыактааһын хантыраагын түһэрсэн, үлэтин саҕалыыр.
Докумуон үлэтэ этэҥҥэ буоллаҕына, сайыҥҥыттан комплекс тутуута саҕаланыа.
Степан Саргыдаев: “Бу комплекс тутуута улуус, нэһилиэк дьаһалталара уонна “Экосистемы Якутии” тэрилтэ бииргэ үлэлэһиибит түмүгэ. Саамай үөрэрим диэн, бу комплекс улууспут экологиятын тупсуутугар биир улахан хардыынан буолар. Бөхпүт-сахпыт ыһыллыбат буолуо, эбиитин
наарданан, умайдаҕына буруота фильтрданан, тулалыыр эйгэбитигэр, тыынар салгыммытыгар куттала суох буолар. Онон, улууһум олохтоохторо бу сонунтан үөрүөхтэрэ диэн эрэнэбин”.
“Экосистемы Якутии” ХЭТ салайааччыта Петр Алексеев: “Бу комплекс тутулуннаҕына, чурапчылар өрөспүүбүлүкэҕэ бастакынан ааттара ааттаныа. Билиҥҥи туругунан, өрөспүүбүлүкэ үрдүнэн биир да регистрацияны ааспыт бөҕү мунньар анал полигон диэн суох. Барыта санкцията суох сыбаалкалар диэххэ сөп».
Сигэтэ: https://xn--80aa7aggbp2b.xn--p1ai/article/41168
