Семен Ефремов Өлөөннөөҕү дьиэ-уот, коммунальнай өҥө хаһаайыстыбатын тэрилтэтигэр слесарь-сантехнигынан үлэлиир. Ааспыт сылга кини сүрүн үлэтин таһынан, эһэтин урукку дьарыгын утумнаан, хоруолук иитиитинэн дьарыктанарга быһаарыммыт. Онон кини нолуок төлүүр тус дьарыктаах киһи быһыытынан регистрацияланан, хоруолугу иитии ымпыгын-чымпыгын үөрэтэн, бизнес-план суруйбут. Ол кэннэ Нэһилиэнньэ социальнай көмүскэллээх буолуутун управлениетыгар сайаапка ыытан, сүүмэрдээһини ааспыт.
Куонкурус түмүгүнэн Семеҥҥа “Кэтэх хаһаайыстыба” бырагырааманан 100 тыһ. солк. кээмэйдээх субсидия биэрбиттэр. Ону таһынан кини саҥа дьарыгар бэйэтин 260 тыһ. солк. харчытын укпут. Бу харчы барыта тутуу матырыйаалыгар уонна хоруолук аһылыгар барбыт. Хайдах саҕалаабытын туһунан Семен маннык кэпсиир:
- Былырыын муус устарга хоруолуктарга анаан 30 кв.м иэннээх маһынан оттуллар оһохтоох хотон туппутум. Хоруолуктарым килиэккэҕэ тураллар, төрүүр хоруолуктарым туспа турар сирдээхтэр. Иитэргэ табыгастаах көрүҥ диэммин, калифорнийскай боруоданы талбытым. Хабаровскай кыраай ууһатааччытыттан уопсайа 12 төбөнү атыыласпытым. Итиччэ ыраах сиртэн аҕалар уустук этэ, онуоха доҕотторум көмөлөспүттэрэ, кинилэргэ махталым муҥура суох. Билигин 18 обургу хоруолуктаахпын. Соторутааҕыта 22 төрүөх эбилиннэ.
Семен этэринэн, хоруолугу иитии улахан ороскуоту эрэйбэт, оттон этэ олус минньигэс уонна иҥэмтиэлээх, тириитэ да улахан туһаҕа тахсар кыахтаах. Онон кини бу дьарыгын салгыы сайыннаран, хоруолугун Өлөөн тас өттүгэр таһааран тарҕатыан баҕарар.
“Мин биисинэһим” өрөспүүбүлүкэтээҕи киин нууччалыы матырыйаалынан бэлэмнэннэ
