Сарсын-өйүүн Ил Түмэн уочарата суох пленарнай мунньаҕар “1945 сыл балаҕан ыйын 3 күнүгэр диэри сокуоннай саастарын ситэ илик гражданнарга социальнай көмө туһунан” диэн сэрии сылларын оҕолоругар көмөнү оҥорууга сокуон барылын бастакы ааҕыыга көрүөхтэрэ.
Бу өр сыллар усталарыгар кэтэспит сокуон барылын Ил Дархан бэйэтинэн парламент көрүүтүгэр киллэрбит. Сокуон барыла “О мерах социальной поддержки граждан, не достигших совершеннолетия на 3 сентября 1945 года” диэн. Саха сиригэр сэрии кэмин оҕолорун ахсаана бу сыл тохсунньу 1 күнүнээҕи туругунан (73 саастарыттан 91-гэр диэри) 31 439 киһи диэн. Кинилэртэн 3961 киһи маннык социальнай көмөнү ылар төрүөттэрэ суох диэн. Ол эбэтэр, маннык социальнай көмөнү 28295 сэрии сылларын оҕолоро ылар кыахтаахтар.
Сокуон барыла тугу этэрий? Парламент ылынар түгэнигэр туох-ханнык көмө оҥоһуллуоҕай?
Сокуон ылыллар түгэнигэр, 2019 сылга бүддьүөттэн 45 677,7 тыһ. солк. көрүллэрэ ирдэнэр. Оттон 2020 сылга – 40 431,3 солк. Маныаха сэрии тулаайахтарыгар судаарыстыбаннай бырагыраама чэрчитинэн номнуо маннык үп көрүллэн турар: 2019 сылга – 785,0 тыһ. солк., оттон 2020 сылга – 868,0 тыһ. солк.
Маннык социальнай көмөнү ылар гражданнарга СӨ Үлэ уонна социальнай харалта министиэристибэтэ анал дастабырыанньаны биэриэҕэ.
Сокуон барылын быһаарыы суругар Аҕа Дойду Улуу сэриитин сылларын оҕолоро оонньооботох оҕо саастарын толук ууран туран, Улуу Кыайыыны уһансыбыттара улахан болҕомтоҕо ылыллыахтааҕын, кинилэр сокуонунан көмүскэллээх буолуохтаахтара ыйыллар.
Сокуон барыла маннык социальнай көмөнү мэктиэлиир:
|
Социальнай көмө |
2019 сылга |
2020 |
|
ЕДВ 966 солк. |
1000 солк. х 3565 киһи х 12 ый. = 42 780,0 тыһ. солк. |
1041 солк. х 3208 киһи х 12 ый = 40074,3 тыһ. солк. |
|
Сыллааҕы диспансеризация |
Гражданнарга босхо мэдиссиинэ көмөтүн оҥорууга судаарыстыбаннай бырагыраамаҕа көрүллүбүт үп иһинэн |
|
|
Сонотуоруйга, куруорка эмтэниигэ путевка сыанатын аҥаара (2018 сылга 1 путевка орто сыаната – 47 тыһ. солк.) |
50 киһи х 48 000 солк. х 50 % = 1200,0 тыһ. солк. |
50 киһи х 49 000 солк. х 50 % = 1 225,0 тыһ. солк. |
|
Дастабырыанньаны оҥорторуу (1 даст. сыаната – 60 солк.) |
60 солк. х 28295 киһи = 1 697,7 тыһ. солк. |
|
|
УОПСАЙА ирдэнэр үп: |
45 677,7 тыһ. солк. |
41 299,0 тыһ. солк. |
|
Судаарыстыбаннай бырагыраама быһыытынан көрүллүбүт |
785,0 тыһ. солк. |
868,0 тыһ. солк. |
|
Эбии ирдэниллэр үп: |
44 892,7 тыһ. солк. |
40 431, 3 тыһ. солк. |
Бу өр сыллар усталарыгар кэтэспит сокуон барыла ылылларын-ылыллыбатын Ил Түмэн бэһис ыҥырыылаах мунньаҕын дьокутааттара быһаарыахтара. Норуот дьокутааттара онто да суох күн-түүн аҕыйаан иһэр сэрии сылларын оҕолорун өйүөхтэрэ дуо?
