Бу туһунан иһитиннэрии, соторутааҕыта, Мииринэй куорат дьаһалтатын саайтыгар таҕыста уонна манна туһааннаах сокуон-быраап иитинэн докумуон оҥоһулунна. Онно этиллэринэн, сүөһүлэрин мэнээк, босхо ыытар хаһаайыттар эппиэккэ тардыллыахтара.
Кырдьык, мин Безымяннай үрэх уҥуор, куораттан чугас даачалаах киһи быһыытынан, ити сиргэ туох буоларын барытын көрөбүн. 2013 сыллаахха, Комсомольскай уулуссатыгар турар, даачалары, куорат чааһынай секторын ыар сытынан тунуйар сибиинньэ улахан хотонун саппыттара. Эмиэ биир оннук хаһаайыстыбаны 2019 сыллаахха Иирэлээх үрэх аттынааҕы даачаларга дьарыйбыттара.
Мииринэй анныгар, Безымяннай үрэх кыйа, ынах сүөһүлэр, сылгылар сайыны, күһүнү быһа тиҥсирийэллэр. Оннооҕу соппоҥ окко тотуохтар үһү дуо?!
Аччык ынах.
Ынах сүөһү, сибиинньэ, коза, сылгы Мииринэй кытыытынааҕы бөһүөлэккэ элбэх. Ынах сүөһүлэр уонна сылгылар чугастааҕы быраҕыллыбыт даачаларга мэччийэллэр, Комсомольскай уулуссаны бүөлээн кэбиһэллэр.
Үрэх саҕатыгар туруоруллубут бөх кутар дьааһыктары күөрэ-лаҥкы тутан, МПЖХ үлэһиттэрин куруук кыынньыыллар. Моҕус сүөһүлэр ас көрдөөн бөҕү уулуссаҕа ыһаллар. Манна топпотохторуна, куорат кытыы уулуссаларыгар тахсан айбардыыллар. Дьикти сүөһүлэр “һай” диэни билбэт, үүрүү диэҥҥэ дьөрү кымаардаабат харамайдар эбиттэр. Хата, кэйбэтэхтэринэ баһыыба. Бэл, ытырыык ыттар кинилэртэн олуһун куттаналлар. Соннук дьиикэй аҥаардаах сүөһүлэр быйыл да көччүйэллэрэ буолуо.
Ынахтар үрэх аттыгар.
Олохтоохтор най барбыт ураа муостаахтартан салҕан, бу туһунан куорат былаастарыгар үҥсүбүттэрэ хас да сыл буолла. Итинэн сибээстээн, мантан инньэ былаастар бас-баттах барбыт сүөһүлэр ханна мэччийэр сирдэрин буларга дьарыктанан эрэллэр. Оттон мэччирэҥ ходуһа бу диэки мэлигир.
Безымяннай үрэх – бу үөттэринэн уонна талахтарынан саба үүммүт сиикээн көҥүс. Тулата - барыта таас, дьэбин тимир-тамыр, бөх-сыыс, помуойа, кута. От диэн суох. Дьэ, тугу быһаараллар?
Мөкү көстүү.
Сылгы бу диэки дэлэй.
Бөх-сыыс аттыгар.
Станислав Алексеев, Мииринэй куората. Ааптар хаартыскалара.
