Уус Алдан улууһугар бүгүн оройуон дьоно өр кэм устата ыра оҥостубут, туруорсубут көмпүүтэринэй томографиянан чинчийии кэбиниэтэ арыллар үөрүүлээх күнэ үүннэ. Ахсынньыга таҥыллыбыт “Philips MX 16-slice” көмпүүтэринэй томограф бары ирдэниллэр миэрэлэри ааһан, бүгүн, кулун тутар 10 күнүттэн үлэтин саҕалаата.
Үөрүүлээх аһыллыыга СӨ Доруобуйа харыстабылын министиэристибэтин ресурнай киинин дириэктэрэ Альберт Жирков, улуус баһылыга Алексей Федотов, дьокутааттар сэбиэттэрин бэрэссэдээтэлэ Иван Колодезников, Мүрү нэһилиэгин баһылыгын солбуйааччы Владилена Колесова, "Сахамедстрах” АО территориальнай салаатын бэрэстэбиитэлэ Варвара Жиркова, улуус кылаабынай бырааһа Анна Петрова, улуус киин балыыһатын салааларын сэбиэдиссэйдэрэ, профсойууһун үлэһиттэрэ уонна медперсонал бука бары кыттыыны ыллылар.
Улуус кылаабынай бырааһа Анна Петрова үөрүүтүн маннык диэн үллэстэр: «Уус Алдан улууһун киин балыыһатыгар саамай кэтэһиилээх, үөрүүлээх күммүт буолла. Кэнники сылларга баҕа санаабыт туолан, көмпүүтэринэй томограф биһиги улууспутугар кэлбитэ. Бу КТ модернизация бырагыраамматынан, Доруобуйа харыстабылын национальнай бырайыагын чэрчитинэн, биһиэхэ кэлэн турар. Томограф сыаната бэйэтэ 35 мөлүйүөн солкуобай, маны таһынан, 4,5 мөлүйүөн аҥаардас кабыныатын бэлэмнииргэ көрүллүбүтэ. Билигин бу туох баар лицензиялаах докумуоннарбытын ситиһэммит, бүгүн ааммытын арыйдыбыт...».
Көмпүүтэринэй томограф аппараатын көмөтүнэн уустук көрдөрүүлэрдээх пациеннар туруктарын чинчийиэхтэрэ, ол курдук, мэйии хаанын эргииригэр улахан кэһиилэри, төбө иһигэр мэйиигэ хаан кутуллуутун, төбө-мэйии эчэйиилэрин быһаарар буолуохтара. Маны таһынан, аппарааты олохтоохтор доруобуйаларын сыныйан көрдөрүнэр кэмнэрин иккис кэрдиистэригэр уонна саҥа хоруона вируһунан ыалдьан ааспыттары бэрэбиэркэлииргэ туттуллара былааннанар.
Сүһүөхтэри, ис уорганнары, тымырдары эргиччи түһэрэр “Philips MX 16-slice” көмпүүтэринэй томографка рентген кэбиниэтин анал үөрэҕи ааспыт быраастара, лабораннара үлэлиэхтэрэ.
Туһаныллыбыт сигэтэ: Уус Алдан улууһун официальнай саайта - Мюрюгазета.рф
