Киир

Киир

Быйыл, 2022 с. Саха АССР төрүттэммитэ 100 сылыгар, Чурапчы орто оскуолата 150 сыллаах кэрдиис кэмин бэлиэтиир.

История докумуоннара көрдөрөллөрүнэн, 1872 сыллаахха муус устар 4 күнүгэр Вознесенскай таҥара дьиэтигэр биир кылаастаах начальнай оскуола аһыллыбыт. Боотурускай улуус араас нэһилиэктэриттэн 25 уол оҕо бастакы үөрэнээччилэр буолбуттар. Дьэ, онтон ыла, олох тутулун араас уларыйыыларыгар сөп түбэһэн, сайдыы суолун тутуһан, аата-суола да уларыйталаан, бу кэмҥэ Өрөспүүбүлүкэ биир кырдьаҕас, бигэ туруктаах үөрэх кыһата буолан кэллэ.

1963 сыллаахха, оскуола томторугар, ШКМ оскуолаҕа тиийэн бастакы кылааска киирбиппин үчүгэйдик өйдүүбүн. Биһиги 1 “б” кылаастар Аксинья Дмитриевна Федороваҕа түбэспиппит. Өрүү сылаас мичээринэн сыдьаайа сылдьар бастакы учууталбытын олус күндүтүк саныыбыт. Тэтэрээппит таһыгар “Е.И. Курашов аатынан орто оскуола 1 “б” кылааһын үөрэнээччитэ” – диэн, кыһаллан туран суруйар этибит. Оскуолаҕа киириэм инниттэн ааҕарга, суруйарга үөрэммит буоламмын үөрэҕи соччо ыарырҕаппат этим. Онтон 1966 сыллаахха күһүн 4 кылааска киирэрбитигэр Чурапчы аҕыс кылаастаах оскуолатын үөрэнээччилэрэ буолбуппут. Сүрүн үөрэнэр оскуолабыт билигин МФСК оннугар турбут уһун дьиэ этэ.

Дириэктэринэн Чурапчы оройонугар үөрэх, спорт сайдыытыгар элбэх үтүөлээх, бу иннинэ оройуоннааҕы үөрэх салаатын сэбиэдиссэйинэн үлэлээбит Гаврил Гаврильевич Кардашевскай анаммыта. Оскуолабытыгар А.Е. Кулаковскай-Өксөкүлээх Өлөксөй аата иҥэриллибитэ.

1966 сылтан 1980 с. диэри уон түөрт сыл устата туспа оскуола буолан үлэлээбит үөрэх тэрилтэтигэр үтүөкэннээх учууталлар үлэлээн, элбэх оҕо үөрэнэн ааспыта. Үлэлээбит учууталлар, тех. үлэһиттэр бу олохтон туорааннар, кинилэр тустарынан ахтар-саныыр да киһи аҕыйаата. Чурапчы оройуонун үөрэхтээһинин эйгэтигэр биллэр суолу-ииһи хаалларбыт, оҕо бөҕөнү олох киэҥ аартыгар атаарбыт үтүөкэннээх учууталлар, ытык-мааны дьоммут этэ буоллаҕа... Билигин бу оскуола историята уопсай орто оскуола иһинэн киирэр, суруллар буолан, билиҥҥи үлэлии сылдьар эдэр дьон ситэ да билбэттэриттэн, устунан умнуллан, сүтэн иһиэх курдук. Онон, саатар бу оскуолаҕа үөрэммит үөрэнээччилэр учууталларбыт туһунан ахтан-санаан, махтанан ааһар ытык иэспит буолуо этэ диэн санааттан бу суруйабын.

Оскуола дириэктэрэ Г.Г. Кардашевскай иитэр-үөрэтэр үлэ таһымын үрдүк кэрдиискэ таһаарбыта. Завуһунан Саха АССР оскуолаларын үтүөлээх учуутала Марфа Дмитриевна Соловьева үлэлээбитэ. Өрүү үөрэн мичээрдии сылдьар, олус сымнаҕас майгылаах учууталбыт биһигини саха тылыгар үөрэппитэ. Кини уруоктарын олус кэтэһэр этибит.

Соловьева М.Д. Чурапчы оройуонугар үөрэхтээһин эйгэтигэр улахан үтүөлээх, биллэр суолу-ииһи хаалларбыт учуутал буолар. 1968 сыллааҕы Бүтүн Союзтааҕы учууталлар съезтэрин делегата. Чурапчы оройуонугар Дьахталлар Сэбиэттэрин тэрийбит, бастакы бэрэссэдээтэлинэн 9 сыл үлэлээбит, бу уопсастыбаннай хамсааһыны сүрүннээбит, Дьахталлар оройуоннааҕы бастакы Спартакиадаларын төрүттээбит киһибитинэн буолар. Бэйэтэ саахымакка оройуон элбэх төгүллээх чөмпүйүөнэ, Өрөспүүбүлүкэ араас таһымнаах күрэхтэһиилэрин кыайыылааҕа, призера. Чурапчы-Таатта үгэс буолбут матчевай көрсүһүүлэрин солбуллубат кыттааччыта, тэрийсээччитэ этэ.

Быйылгы оскуола үбүлүөйдээх сылыгар, 2022 с. балаҕан ыйын 14 күнүгэр Соловьева Марфа Дмитриевна 100 сааһа туолар. Онон сибээстээн, Үөрэх дьаһалтата, Спорткомитет, улуустааҕы бэтэрээннэр, Дьахталлар Сэбиэттэрэ Марфа Дмитриевнаҕа аналлаах дьаһаллары ыыталлара сиэрдээх буолуо этэ дии саныыбын, тэриллиэ диэн, биир үөрэнээччитэ буолан туран, эрэнэбин!

Нуучча тылыгар Аҕа дойду сэриитин бэтэрээнэ Федоров Петр Николаевич, Слепцова Евдокия Григорьевна, Керемясова Анна Егоровна олус интириэһинэй, үчүгэй уруоктары ыыталлар этэ. Петр Николаевич ис-иһиттэн интэлигиэнтинэй, үрдүк култууралаах, оҕолорго аҕалыы сыһыаннаах учуутал этэ.

Евдокия Григорьевна нуучча поэттарын, суруйааччыларын айымньыларын үөрэнээччигэ олус тиийимтиэ гына үөрэтэрэ. Хоһооннорун наһаа холкутук, ис дууһатыттан ааҕарын өйдүүбүн.

Ахсаан уруоктарыгар Федот Алексеевич Константинов үөрэтэр этэ. Бөдөҥ-садаҥ, үскэл көрүҥнээх, улахан саҥалаах учууталбытыттан толлор этибит. Переменаҕа кыараҕас көрүдүөрү толору хааман истэҕинэ, киниэхэ көстүмээри, онно-манна саһар буоларбыт. Дьиҥинэн, эмиэ сымнаҕас, оҕоҕо оҕолуу сыһыаннаах үтүөкэн учууталтан оччотооҕу оҕо сиэринэн салларбыт эбитэ буолуо.

Оскуолабыт уһун көрүдүөрдээх, киирэри кытта тамбурдаах, икки хос ааннаах этэ. Кэҥэс соҕус фойе баара, линиэйкэлэр, усбуордар онно лыык курдук симиллэн ыытыллар этилэр. Улахан баҕайы түннүктэрдээх, бастаан утаа оһоҕунан оттуллар курдук өйдүүбүн. Онтон кэлин соҕуруу өттүгэр хочуолунай оҥоһуллубута, чугуун батарыайалар баар буолбуттара.

Эрдэ интэринээт буолан турбут, билигин Сбербанк турар сиригэр баар куорпуска эмиэ үөрэнэр этибит. Кэлин 4-с куорпус диэн ааттанар буолбута.

Киэҥ көрүдүөрдээх буолан, онно араас линиэйкэлэр, Саҥа Дьыллааҕы утренниктар, физкультуура уруоктара эмиэ буолаллар этэ. Кэлин, Чурапчы орто оскуолатыгар үлэлии сылдьан, аны бэйэм ол үөрэммит көрүдүөрбэр алын кылаастарга физкультура уруоктарын ыыта сылдьыбытым.

Үлэ уруоктарыгар Иван Андреевич Антипин үөрэтэр этэ. Мастарыскыайбыт улахан орто оскуола мастарыскыайыгар сыһыары тутуллубут дьиэҕэ баара. Сүрдээх ирдэбиллээх, кытаанах учуутал этэ. Уруһуй, черчение уруоктарыгар эмиэ кини үөрэппитэ. Иван Андреевич ону таһынан оскуолаҕа туризм куруһуогар элбэх оҕону бэлэмниирэ. Оройуон, Өрөспүүбүлүкэ күрэхтэһиилэригэр элбэхтэ кыттар, кыайар этилэрэ.

ОҔОЛОР

Физкультура уруоктарыгар бастаан сэрии бэтэрээнэ Семен Михайлович Максимов үөрэтэр этэ. Учууталлар, үөрэнээччилэр даҕаны кинини “Буденай” диэн ааттыыр этибит.

Үрдүкү кылаастарга Поликарп Егорович Барахсанов кытаанах илиитигэр киирбиппит. Уруоктарбыт орто оскуола саалатыгар, көрүдүөргэ, былаһааккаҕа буолаллара.

Захаров В.П. ыытар гимнастика, остуол тенниһигэр, тустууга ШКМ көрүдүөрүгэр маат таһан интэринээт-оскуола үрдүкү кылааһын уолаттара ыытар секцияларыгар сылдьар, дьарыктанар этибит.

1969-1971 сылларга бэрт уһуннук тутуллубут успуорт саалата үлэҕэ киирбитэ.

Саҥа сааланы Чурапчы аҕыс кылаастаах оскуолатын бас билиитигэр биэрбиттэрэ. Ону билигин дириэктэрбит Г.Г. Кардашевскай, физкультурабыт учуутала П.Е. Барахсанов сабыдыаллара, үтүөлэрэ буолуо дии саныыбын. Онон, саҥа спортивнай саалаҕа бастакынан үөрэммит, дьарыктаммыт оҕолор биһиги буолабыт. Поликарп Егорович үлэтин, Чурапчыга физкультура, успуорт сайдыытыгар үтүөлэрин бары билэбит, элбэх суруллунна, үлэтэ сөптөөхтүк сыаналанна.

Биһиги үөрэнэр кэммитигэр Мэҥэ-Хаҥалас Нуораҕана аҕыс кылаастаах оскуолатын кытта спортивнай сибээһи олохтообута. Хардарыта сылдьыһан күрэхтэһэр этибит, успуорт араас көрүҥэр күөн көрсөр үгэс олохтоммута. Онно күрэхтэһэ бара сылдьан, интэринээппитигэр түһэрбиттэригэр, аан бастаан тэлэбииһэр диэни көрөн сөҕүү-махтайыы буолбуппутун өйдүүбүн.

Историяҕа Р.И. Васильев үөрэтэрэ. Оччолорго да балай да сааһырбыт киһи этэ. Бэрт сэргэх, интэриэһинэй уруоктары ыытара. Дмитрий Сергеевич Постников саха тылыгар үөрэппитэ, элбэҕи уруок тас өттүнээҕи тиэмэҕэ кэпсиир этэ. Олоҥхоһуттар тустарынан элбэҕи билэрэ. Олус сымнаҕас, үөрэнээччигэ биир тэҥ үчүгэй сыһыаннаах этэ. Төрөппүттэрбитин, төрдүбүтүн-ууспутун бэркэ билэр этэ, ону элбэхтэ кэпсиирэ. Аҕабынан төрдүбэр Чөлөс диэн улахан олонхоһут баарын бастаан киниттэн истибитим. Оҕолору сахалыы таттаран ааттыырын сөбүлүүр этэ, холобура: “Сэмэнньэ оҕото Өлөксөөйөп Кууһумаа”, - эҥин диирэ.

Скан 20220218 2

Сима Сергеев аатынан пионерскай дружиналаах этибит. Бэтэрээн учууталбыт С.М. Максимов Уорҕаҕа кинини үөрэппит буолан, пионерскай усбуордарга герой-пионер туһунан кэпсиирин өйдүүбүт.

Биһиги үөрэнэрбит саҕана Евдокия Кириковна Софронова-Кыра Дуунньа пионер баһаатай этэ. Чурапчыга успуорт хамсааһынын салайбыт, сайыннарбыт А.К. Софронов кыра балтыта. Улахан балтыта Евдокия Кириковна эмиэ химияҕа үөрэппитэ.

Пионерскай дружина анал хостоох этэ. Сима Сергеев истиэндэтэ, биографията бааллара. Көрүдүөрбүтүгэр, сороҕор ШКМ-ҥа улахан пионерскай усбуордар, линиэйкэлэр буолаллар этэ. Знамя, горнист, барабанщиктар, рапорт бөҕө буоларбыт. Үөрэхпэр ситиһиим иһин 1970 сыллаахха Бүтүн Сойуустааҕы В.И. Ленин аатынан “Артек” пионерскай лааҕырга Хара муора кытыытыгар сынньанан кэлбитим – оҕо сааһым саамай сырдык өйдөбүлэ. От ыйын ортотуттан атырдьах ыйын ортотугар диэри норуоттар икки ардыларынааҕы сезоҥҥа түбэһэн, элбэх омук дойду оҕолорун кытта бииргэ сылдьыбыппыт, доҕордоспуппут. Чурапчы орто оскуолатыттан Галя Васильеваны кытта барбыппыт.

Евдокия Кириковна, уонна оччолорго оройуон Комсомуолун салайар аппаратыгар үлэлиир, эдьиийим курдук саныыр киһим Винокурова Людмила Михайловна, кыһанан туран тэрийэн ыыппыттарыгар, күн бүгүнүгэр диэри махтанабын. “Артектан” хас да омук пионерскай хаалтыстарын, сувенирдары аҕалан пионерскай дружина хоһугар Евдокия Кириковнаҕа туттарбытым,. Аҥаара маҥан, аҥаара күөх Куба пионердарын хаалтыстара этэ.

Скан 20220218 8

1968 с. күһүнүгэр, 6-с кылааска киирэрбитигэр, Подмосковье Коломна куоратын педагогическай институтун бүтэрбит эдэркээн нуучча кыыһа Маркина Александра Сергеевна физика учууталынан үлэлии киирбитэ. Эдэр учууталы биһиги 6 “б” кылаас салайаачытынан анаабыттара. Мэник-тэник соҕус кылаас этибит. Александра Сергеевна араас элбэх сонун тэрээһиннэри ыытар этэ. Оскуолабыт арҕаа өттүн кытыы кылааһа физика кэбиниэтэ этэ. Кылааспыт салайааччыта физик буолан, ол кылаас биһиэнэ курдук этэ. Элбэх прибордар, оборудование баара. Кылааспыт илин өттүгэр хоско киинэ аппараата турбута. Учууталбыт уруокка элбэх учебнай киинэлэри көрдөрөр этэ. Аны уруоктар кэннилэриттэн араас уус-уран сэриилээх киинэлэри көрөр этибит. Индийскэй “Бродяга” уонна “Цветок в пыли” диэн киинэлэри көрөрбүт. Кыргыттар ытаһалларын өйдүүбүн.

Александра Сергеевна олус кыһамньылаах, үлэһит учуутал этэ. Эдэр да буолан буолуо, наар оскуолаҕа баар буолааччы. Күһүн, саас айылҕаҕа похуоттарга, сиргэ хонуулаах экскурсияларга эҥин тэҥҥэ сылдьыһар этэ. Сахалыы тыллары саҥара үөрэнэ сатыыр этэ, сатаан саҥарбакка күллэртиир буолара.

Кыһын кылааспытын икки хамаандаҕа арааран КВН ыыппыта. “СОУС” - смелые, отважные, умелые, смекалистые уонна пираттар хамаандалара диэн күрэхтэспиппит. Викториналардаах, араас күрэхтэһиилээх бэрт сэргэх тэрээһин буолбута, көрөөччүлэр, ыалдьааччылар да бааллара. Сима Новгородов капитаннаах пираттар хамаандалара бэрт тэҥ киирсиигэ кыранан кыайбыттара. Билигин санаатахпына, ити арааһа Чурапчыга бастакы КВН эбитэ буолуо, ол иннинэ оннук баарын да билбэт этибит. Саха Өрөспүүбүлүкэтын үтүөлээх учуутала, улуу нуучча норуотун кыыһа Яковлева Александра Сергеевна Чурапчыны иккис дойду оҥостон, биир бастыҥ уолбутунаан Дмитрий Дмитриевичтыын быр-бааччы олороллор. Уоллара Олег оскуоланы кыһыл көмүс, кыыстара Инна үрүҥ көмүс мэтээлинэн бүтэрбиттэрэ. Билигин ийэлэрин дойдутугар Москватааҕы химико-технологическай институту бүтэрэн, онно үлэлии сылдьаллар. Ийэлээх аҕаларыгар биэс сиэни бэлэхтээн, билигин Москваҕа Яковлевтар ыччаттара үөрэнэ-үлэлии сылдьаллар.

Александра Сергеевна биэнсийэҕэ тахсыар диэри Чурапчы орто оскуолатыгар физика учууталынан үлэлээбитэ. Бу оскуолаҕа физкультура учууталынан үлэлиир сылларбар учууталбынаан бииргэ үлэлээбитим. Мин үөрэтэр кылаастарбар икки выпуска кылаас салайааччытын үлэлээбитэ. Эмиэ буоларын курдук сүрдээх актыыбынай кылаас салайааччыта этэ. Оскуола иһинэн ыытыллар успуорт күрэхтэһиилэригэр оҕолорун кытта олох тэҥҥэ сылдьыһара, оҕолоругар ыалдьан бөҕө буолара.

Кини кылаастара олус түмсүүлээх, бэйэ-бэйэлэрин, төрөппүттэрин кытта биир ситимнээх иллээх кылаастарынан буолаллар этэ.

Сивцев Егор Егорович эмиэ олох эдэригэр учууталлыы кэлбитин өйдүүбүт. Сүрдээх дьээбэлээх буолар этэ. Тоҕо эбитэ буолла, гипнозтаах үһү диэн салларбытын саныыбын. Биологияҕа үөрэппитэ.

Библиотекарбыт Смена Семеновна Борисова этэ. Элбэх кинигэ уларсан ааҕар буоламмын Анисимов Сергейдиин элбэхтэ сылдьар этибит.

Соловьева М.Д. кэнниттэн Анна Александровна Борисова саабыстаабыта. Устуоруйа уруоктарыгар үөрэтэр этэ. Кэлин музыка уруоктарыгар мелодиска, кэлин Өрөспүүбүлүкэ үтүөлээх артыыһа Шахурдина Г.Н. үлэлии кэлбитэ.

Бу оскуолаҕа саамай уһуннук, таһаарыылаахтык үлэлээбит учууталлартан биирдэстэрэ Аграфена Игнатьевна Санникова буолар. Оскуола эрэ иһинэн буолбакка, оройуон уопсастыбаннай үлэтигэр элбэх киэҥ далааһыннах үлэни үлэлээбит, оҕо бөҕөнү үөрэппит убаастыыр учууталбыт. Биһигини математикаҕа үөрэппитэ.

Е.М. Дьячковская, Т.В. Бургаева (Максимова), К.П. Поливкина, Р.Р. Кулаковская, М.Д. Илларионова уо.д.а. үгүс ыччаты билии суолугар киллэрбиттэрэ.

Кардашевскай Г.Г. кэнниттэн дириэктэринэн Р.М. Саввин, В.В. Илларионов үлэлээн, үөрэтии-иитии саҥа хайысхаларын киллэриигэ, кэбиниэтинэй систиэмэни сайыннарыыга күүскэ үлэлээбиттэрэ.

Биһиги бүтэрэн барбыппыт кэннэ элбэх учууталлар үлэлээбиттэрин билэбит. Арассыыйа Үтүөлээх учуутала Г.Г. Пинигина, СР Үтүөлээх учуутала С.Е. Потапова үлэлэрин бу оскуолаттан саҕалаабыттара. Анастасия Степановна Чичичгинарова бу эдэр учууталларга үтүө сүбэһит, настаабынньык, элбэх үөрэнээччи махталын ылбыт үтүөкэннээх учуутал этэ.

Уонна да элбэх учуутал сүрэхтэрин сылааһын оҕолорго биэрэн, үөрэтэн-иитэн олох суолугар киллэрбиттэрин махталлаах үөрэнээччилэрэ өйдүү-саныы сылдьалларыгар саарбахтаабаппын.

Оскуоланы элбэх чаҕылхай үөрэнээччилэр бүтэрбиттэрэ. Саха Өрөспүүбүлүкэтин Ил Дархана Егор Афанасьевич Борисов – оскуола 1969 сыллаах выпускнига. Кини үлэтин-хамнаһын, ситиһиилэрин бары билэбит, сиэрдээхтик киэн туттабыт.

1968 сыллаах бастакы бүтэрээччилэр Яковлев Ганя, Захаров Коля оройуон бастыҥ спортсменнара этэ. Убайым Сивцев Ваня 1965 сыллаахха “Артек” лааҕырга сылдьыбыта, саахымакка Өрөспүүбүлүкэ чөмпүйүөнэ, сүүмэрдэммит хамаанда чилиэнэ этэ.

Иккис выпустар Филиппов Василий, Поисеева Света, Эверстова Вера уо.д.а.кэлин норуот хаһаайыстыбатын араас салааларыгар ситиһиилээхтик үлэлээбиттэрэ.

Биһиги анныбытынан үөрэммит оҕолортон Посельскай Федя, Посельская Тася, Нохтунская Аля уонна да элбэх оҕо туйгуннук үөрэммиттэрэ, кэлин үлэлэригэр да дьоһун ситиһиилэммиттэрэ.

Посельскай Федор Федорович СГУ-га ИТФ хаапыдыра сэбиэдиссэйинэн олоҕун устата үлэлээн кэлбитин билэбин. Кини - доцент, техническэй наука кандидата.

Биһиги 1971 сыллаахха бүтэрбиттэртэн Анисимов Сергей СР Норуот хаһаайыстыбатын үтүөлээх үлэһитэ, Арассыыйа, СӨ ОДьКХ Бочуоттаах үлэһитэ, “Гражданскай килбиэн” бэлиэ хаһаайына, Амма улууһун Бочуоттаах олохтооҕо. Сергей Егорович өр сылга Амма улууһун олох-дьаһах хаһаайыстыбатын, Саха Өрөспүүбүлүкэтин ОДьКх үлэһиттэрин Профсоюһун үрдүк таһаарыылаахтык салайбыт үтүөлээх үлэһит. Билигин СӨ Олох туругун хааччыйар тэрилтэ Профсоюһугар үлэлии сылдьар. СӨ уопсастыбаннай палаататын чилиэнэ.

Аржаков Коля СӨ Норуотун хаһаайыстыбатын Үтүөлээх үлэһитэ, СӨ Бочуоттаах тутааччыта, Чурапчы улууһун Бочуоттаах олохтооҕо. Николай Афанасьевич билигин “Чурапчы” СХПК дириэктэрэ, улууска ат успуордун Федерациятын салайааччыта буолан төрөөбүт Чурапчытыгар Манчаары Баһылай спартакиадаларыгар, улахан бириистээх ат сүүрүүтүгэр элбэх кыайыыны аҕалсыбыт Федерация бэрэссэдээтэлэ.

Новгородов Сима РФ потребкооперациятын туйгуна, үлэ, спорт бэтэрээнэ.

Алексеев Кузя өр сылларга сибээс тэрилтэтигэр үтүө суобастаахтык үлэлээн, оройуоҥҥа сибээс сайдыытыгар, бастакы түргэн сибээс, интэриниэт киириитигэр үгүс кылаатын киллэрбит үлэһит. СӨ Сибээһин Бочуоттаах бэтэрээнэ, РФ-ҕа үлэ бэтэрээнэ.

Петрова Надя СӨ Доруобуйаҕа харыстабылын туйгуна, Эмп үлэһиттэрин эйгэтин Бочуоттаах бэтэрээнэ.

Дора Постникова ГУП ОДьКХ Бочуоттаах бэтэрээнэ, өр сылларга Амма оройуонун бу тутаах эйгэтин эрэллээх үлэһитэ.

Корякина Шура СӨ Бэчээтин туйгуна, үлэ бэтэрээнэ.

Валя Прядезникова СӨ үлэ бэтэрээнэ .

Колесов Вася идэтинэн хайа инженерэ. Өймөкөөҥҥө көмүс бириискэтигэр, улустааҕы ПМК-ҕа дириэктэринэн үлэлээбитэ.

Эверстов Гоша юстиция старшай сүбэһитэ, полковник, РФ, СӨ суут, силиэстийэ уорганнарын элбэх тустаах наҕараадатын хаһаайына.

Уонна да атын бииргэ үөрэммит оҕолорбут олох, үлэ араас хайысхаларыгар үлэлээн билигин бочуоттаах сынньалаҥҥа олороллор. Сорохтор, хомойуох иһин, бу орто дойду олоҕуттан эрдэ бараахтаатылар.

Онон, Чурапчы оройуонун үөрэхтээһинин сайдыытыгар үлэлээбит, үгүс кылаатын киллэрсибит Чурапчы аҕыс кылаастаах оскуолата аата ааттана туруохтаах. Үөрэх, билии сырдык суолун арыйбыт, олоххо элбэх оҕону кынаттаабыт үтүөкэннээх Учууталларбыт махталлаах үөрэнээччилэрэ баарбыт тухары үтүө мөссүөннэрэ умнуллуо суоҕа!

Дьяконов Виктор Семенович – оскуола 1971 с. выпускнига.
Арассыыйа Федерациятын физкультуратын уонна успуордун туйгуна, СӨ Үөрэҕириитин туйгуна,
СӨ “Урожай” успуорт түмсүүтүн Бочуоттаах үлэһитэ, СӨ Үөрэҕириитин Бочуоттаах бэтэрээнэ
Тарҕат:

Санааҕын суруй