Киир

Киир

Саха сиригэр кэнники сылларга саҥалыы хааччыллыылаах, киэҥ-куоҥ таас бэликилииникэлэри тутаттаан аҕай биэрдилэр.

Аллараа Бэстээх, Үөһээ-Бүлүү, Покровскай, Бэрдьигэстээх, Нам, Чурапчы, Ньурба бэликилииникэлэрэ дьэргэһэн эчи үчүгэйдэрин, улахаттарын, сырдыктарын, киэҥнэрин-куоҥнарын.

Эһиил Тааттаҕа үс этээстээх саҥа бэликилииникэ аһыллыаҕа.

Оттон Сунтаар улууһун бэликилииникэтигэр сырыттахпына, кини төһө да кичэллээх өрөмүөнү барбытын үрдүнэн, кыараҕаһа, эргэрэн эрэрэ тутатына биллэр. Мин эрэ оннук санаабаппын.

IMG 20210324 WA0004

Бастатан туран, бу – ССРС кэминээҕи тутуу. Мин бу дьиэ сыбаайата түһэр, тулааһына дьэндэтиллэр кэмигэр Сунтаарга баар этим. Эбийиэги, 1982 сылтан ылата белорустар (оччолорго Белорусскай ССР) сылдьар В.И. Мелешкевич биригээдэлэрэ туппуттара.

Онон, бу – ааспыт үйэтээҕи, быһа холуйдахха, 40 сыл аннараа өттүнээҕи тутуу. Номнуо эргэрбит эбийиэк. Бырайыага, оҥкула – сэбиэскэй кэмнээҕи. Ол саҕана, манна Сунтаар оройуонунааҕы ССКП, ЫБСЛКС кэмитиэттэрэ үлэлээбиттэрэ. Бу дьиэҕэ мин, 1988-89 сылларга ЫБСЛКС райкомугар үлэлээбитим. Тыа оройуонугар оччолорго таас дьиэ сэдэх буолан барыта сонун этэ. Ону баара, тутааччылар бу таас дьиэ уутун-хаарын утумун сатала суох таҥаннар, носуостара уу да хачайдаабат этэ, туалет да үлэлээбэтэҕэ. Саахалтан дьалбарытынан, ТВК-тан (тепловодоканализация) утумуттан аккаастаммыттара. Кииннэммит ититии эрэ хаалбыта.

Дьэ, оннук дьиэҕэ улуус бэликилииникэтэ олохсуйбута балачча кэм буолла. Кирилиэстэригэр кыамматтарга-инбэлииттэргэ аналлаах пандус мэлигир, иһигэр кыараҕаһа сүрдээх. Лифт диэн ончу суох.

IMG 20210324 WA0030

2012 сыллаахха, сэтинньигэ манна сылдьарбар сап саҕаттан иҥнэ сылдьар гардеробтарын үөһээ этээскэ таһаарбыттара, элбэх таҥаһы ыйыылларын уйбакка суулла турара. Аны быраастар кэбиниэттэрэ, процедурнайдар уонна регистратура кыараҕастара!

Эмчиттэр хайдах маннык усулуобуйаҕа үлэлииллэрин, ыарыһахтар кыбычыын сиргэ уочараттыылларын, олорор сир кэмчитин көрөн саллыбытым. Сунтаарга саҥа бэликилииникэ тутуллара буоллар диэн киччэм санаа үөскээбитэ.

Аныгы усулуобуйанан уонна Доруобуйа харыстабылын министиэристибэтин, Роспотребнадзор ирдэбиллэринэн бэликилииникэ мантан быдан киэҥ-куоҥ, тупсаҕай, салгын оонньуур (вентиляция) усулуобуйалаах буолуохтаах этэ. Инньэ дии санаабаккыт дуо?

Станислав Алексеев. Мииринэй куората, ааптар хаартыскалара.

Тарҕат:

Санааҕын суруй