"Кыым" хаһыат ааспыт нүөмэригэр "Таас оскуола - кэскил түстэниитэ" диэн Сунтаар оройуонун Кириэстээх нэһилиэгэр саҥа таас оскуола тутуллуутун туһунан сонун тахсыбыта...
Бачча үөрүүлээх сонуну үллэстибиччэ, оскуола дириэктэрэ Павел Васильевич Васильев тус санаатын истибэтэххэ ситэтэ суох кэпсээн, ситэриллибэтэх сэһэн тэҥэ буолуо диэн, сибээстэһэ сырыттым.
– Оскуола дьиэтин үөрүүлээх аһыллыыта муус устар 1 күнүгэр буолуоҕа. Онуоха диэри ситэрии-хоторуу, саҥа тэриллэри таҥар-мантаастыыр, сууйар-сотор үлэ үгэннээн турар. Холобур, иистэнэр, уһанар мастарыскыайдар бары саҥа тэрилинэн, станоктарынан, оверлоктарынан уо.д.а. толору хааччыллыахтара. Барыта кэлэн турар. Бу саҥа таас тутууну, аныгы тэриллэри көрөн, киһи эрэ санаата кэлэн, айар-тутар, үлэлиир, үөрэнэр баҕата күүһүрэр. Бары да санаабыт өрө көтөҕүллэн сылдьар. Алмаас дивидениттэн киирэр үпкэ тутуллубут таас оскуолаҕа бастакы алмаас көстүүтүгэр, бырамысыланнас атаҕар турарыгар үлэлээбит, кыттыбыт дьон оҕолоро, сиэннэрэ үөрэнэр буолбуттара олус кэрэхсэбиллээх.
Бу оскуолабыт эрдэ, 8 кылаастаах эрдэҕинэ, 1972 сыллаахха, САССР 50 сылын аатынан диэн буолбута. Оттон бу саҥа оскуолабыт анаабыт курдук, САССР 100 сылыгар сыһыаран, аанын тэлэйэ аһара – туһунан дьикти, бэлиэ да диэххэ сөп. Билигин оскуолабыт Иван Григорьевич Спиридонов аатын сүгэр. «Цифровая образовательная среда» уонна «Точка Роста» икки федеральнай бырайыакка киирсэбит. Маннык тэҥинэн икки бырайыакка үлэлэһэр оскуола улуус үрдүнэн суоҕа да буолуо.
Ону таһынан дойду үрдүнэн үлэлиир «функциональная грамотность» бырагырааматыгар хапсан, күүскэ үлэлэһэн, сыыппара үөрэҕэр үөрүйэхтэнэр (стажировкаланар) былаһаакка диэн буолбуппут. Онон, саҥа оскуолаҕа киирэргэ бэлиэ ситиһиилээхпититтэн сэмэйдик үөрэбит. Мантан инньэ политехническай хайысхаҕа күүскэ ылсар санаалаахпыт. Оҕолорбут бырамыысыланнас идэтигэр сысталларын, сэҥээрэллэрин уонна онно бэлэмнээх буолалларыгар оскуола саҕаттан үлэ барыахтаах. Алмаастаах Мииринэй биһигиттэн букатын чугас. Кириэстээх нэһилиэгиттэн билигин 70-ча киһи алмаас бырамыысыланнаһын араас эйгэлэригэр ким – бастайааннай үлэҕэ, ким – баахта ньыматынан сылдьар. Өссө да эбиллэн иһэригэр баҕалаахпыт.
– Оскуола туһунан кылгастык билиһиннэрэ түспэккин ээ? Үөрэххэ киирии чааһа хайдаҕый?
– Күн бүгүн биһиги оскуолабыт 119 үөрэнээччилээх. 45 үлэһит баарыттан учуутала – 28. Кэнники түөрт сылга салайбыт кэммин этэр буоллахха, оскуоланы бүтэрээччи 100 бырыһыана орто уонна үрдүк үөрэххэ киирэр. Хас сыл аайы кыһыл көмүс мэтээлинэн бүтэрээччилээх буолабыт. Оҕолорбут ордук юрист, медик идэтигэр сөбүлээн киирэллэр. 100 бааллаахтар бааллар. Кэнники сылларга үгүстэр, ханна да буоларын курдук, орто үөрэҕи талар буоллулар. 2017 сыллаахха улууска бастакынан нуучча тылыгар 100 баалы биһиги оскуолабыт үөрэнээччитэ ылбыта.
Оскуола тутуутугар төнүннэххэ, тутуу үлэтэ үс сылтан икки сылыгар барда. Хамсык хааччаҕа атахтаабатаҕа буоллар, икки сылынан бүтүөн да сөбө. Билиҥҥи усулуобуйаҕа улууспут баһылыга, тутааччыларбыт, урбаанньыттарбыт дьаныардаах үлэлэрэ оскуола кылгас кэм иһигэр киирэригэр бигэ тирэх буолла. Оттон уонна алмаас дибидиэнэ олохтоохторго туһата, көдьүүһэ улаханын бу да тутуу дьэҥкэтик көрдөрөр.
ЛОһУУРА.
