Мииринэй куорат ырыынагар эт бородууксуйата мэлийдэ.
Сылгы этэ бар туомугар баара. Ону былдьаһан-тарыһан толунньаҥ да уҥуоҕун хаалларбатахтар. «Юбилейнай» атыы-эргиэн Киинигэр, бэл, салгылаабыт собо да көстүбэт. Хараарҕаан Сибиир куораттарын эттэрин атыыластахпытына хоргуна да суох, амтана да кумааҕы курдук.
Улахан промышленнай оройуоннары кытары сэргэ олорор Сунтаар т/х бородууксуйатынан бэйэтин улууһун эрэ хааччыйар. Мииринэйгэ атыылыы кэлэргэ киниэхэ барыс ончу суох. Ол да иһин, интэриэс мэлигир.
Эмис эт Сунтаартан аны кэлбэт.
Чугас улуустарбыт тыа хаhаайыстыбатын батарааччылара – бары кэриэтэ итинник балаһыанньалаахтар. Уончалыы тыһыынча нэһилиэнньэлэммит, кыра куораттар саҕа буолбут улуустарын кииннэрин аһаталлар. Эбэтэр бородууксуйаларын сиэрэ суох кэҥээбит Дьокуускайга тиэйэллэр.
Бэл, ыаллыы Ленскэй Нүүйэтиттэн хортуоппуй, хаппыыста аҕалбат буоллулар. Эмиэ кэлэйбиттэрэ дуу?!
Бүлүү умнаhын улуустарыттан тыа хаhаайыстыбатын бородууксуйатын онороооччулары, биhиги – мииринэйдэр, бэйэбит тэйиттибит.
Тыа дьоно бачча ыраах эргинэ кэлэн баран Мииринэйгэ ыстарааптаммыттарын, хасыhан туран бэрэбиэркэлээбиттэрин, атыылаһааччылар сирбиттэрин-талбыттарын, ньиэрбэлэригэр оонньообуттарын умнубаттар. Ким, кинилэргэ эргинэр миэстэ иhин «ыараабытай-чэпчээбитэй», мэhэй-таhай буолбутай? Ол хоччорхой сыhыаммыт содулугар бэйэлээх бэйэбит дойдубут сылгыбыт этиттэн да көрө маттыбыт.
Билигин, куорат ырыынагын иһигэр да таһыгар да, олохтоох эт да, балык да атыылыыр уурайан турар. Балыктар салгылаан, мэктиэтигэр саһархайдыҥы өҥнөммүттэригэр атыылыыр дьон ыксаан, туһааннаах миэстэлэрин буллардылар.
Муус устар ыйа ортолуура чугаһаата. Эппит-балыкпыт – барыта кэлии, туох да амтана-сүмэтэ суох. Дьаабыттан дьаабы.
Маннык эт биһиэхэ суох.
Станислав Алексеев. Мииринэй куората. Ааптар хаартыската.
