“Сахаэнерго” АУо генеральнай дириэктэрэ (“Якутскэнерго” ПАУо РусГидро бөлөҕөр киирэр алын тэрилтэтэ), норуот дьокутаата Гаврил Алексеев Үөһээ Бүлүү улууһун саамай уһук турар, дизелинэн үлэлиир уот ыстаансыйатын тиийэн көрдө-иһиттэ.
Бу эбийиэк улуус кииниттэн 500 км ыраах сытар Туобуйа сэлиэнньэтигэр баар. Манна кыһыҥҥы эрэ суолунан тиийиэххэ сөп. Кэнники сылларга сэлиэнньэ уотун ситимин саҥардыыга элбэх үлэ ыытылынна. 2019 сылга 600 кВт кыамталаах дизелинэн үлэлиир аныгы уот ыстаансыйата үлэҕэ киирбитэ, уулуссалар уоту харыстыыр лаампаларынан сырдатыллыбыттара.
«Туобуйаҕа тиийэр суол сотору сабыллар, онон биһиги манна дизель оттугун уонна өрөмүөн матырыйаалын барытын тиэйэн аҕаллыбыт. Уопуттаах энэргиэтик Спиридон Сидоров салайыытынан үчүгэй үлэ бара турар диэн сыаналыыбын. Кыһыны этэҥҥэ алдьаныыта-кээһиниитэ суох туораатылар, сыалы-соругу ситистилэр. Эбийиэк салайааччытын уонна үлэһиттэри кытта кэлэр дьыллааҕы үлэ былаанын быһаарыстыбыт. Филиалбыт үлэһиттэрэ эдэрдэр», – диэн Гаврил Алексеев кэпсээтэ.
Маны таһынан, дьокутаат Үөһээ Бүлүү улууһун Маҥаас уонна Далыр нэһилиэнньэтин кытта көрүстэ. Олохтоохтор кыһалҕаларын үллэһиннилэр уонна парламентарийы ыраас иһэр уунан хааччыллыыга, уу кутар саҥа тырааныспары ылыыга көмөлөс диэн көрдөстүлэр. Бу нэһилиэктэргэ өссө быраас тиийбэт уонна бэйдиэ ыт кыһалҕата сытыытык турар эбит.
Сонун төрдө: «Сахаэнерго» АУо пресс-сулууспата
