Нина Алексеева Тэхэниичэскэй лиссиэйэ быйыл үйэ чиэппэрдээх үбүлүөйүн бэлиэттир. Бу үбүлүөйдээх бэлиэ сылга оскуола үөрэх дьылын кэккэ ситиһиилэрдээх түмүктүүр. Быйылгы выпускниктар бары 100% номнуо дойду киин үрдүк үөрэҕин кыһаларыгар мэктиэлэнэн тураллар. Былырыыҥҥы выпускниктар бары кыһыл көмүс мэтээллээх бүтэрбиттэрэ. Кинилэр билигин бары талан ылбыт үөрэхтэригэр ситиһиилээхтик үөрэнэ сылдьаллар.
Нина Афанасьевна салайар лиссиэйэ 25 сыл устата үөрэнээччилэри кыра саастарыттан инновационнай тиһик модельынан үөрэтэр. Бу сыллар усталарыгар оҕолор саастарын иннинэ оскуоланы ситиһиилээхтик бүтэрэллэрэ ситиһилиннэ.
“Быйыл биһиги үбүлүөйдээх үөрэх дьылын улахан ситиһиилээх түмүктүүбүт. 11 кылаас 24 үөрэнээччитэ бары Арассыыйа саамай үчүгэй үөрэхтэрин кэккэлэригэр киирэргэ мэктиэлэннилэр”, — диир Нина Афанасьевна.
Оскуола үбүлүөйүнэн бастакы бэрэсидьиэн Михаил Николаев эҕэрдэлээтэ.
“Эһиги чахчы даҕаны өрөспүүбүлүкэ биир бэлиэ оскуолатынан буолаҕыт. Нина Афанасьевна айбыт иннвациялаах технологиятын туһанан, бу сыллар усталарыгар оҕо кыра сааһыттан үчһгэй билиини, үөрэҕи, идэни ыларын дакаастаатыгыт”, — диэтэ Михаил Ефимович.
Нина Афанасьевна айбыт систиэмэтин көмөтүнэн Саха сирин араас муннуктарыттан оҕолор үрдүк үөрэҕи ыллылар, аспирантураҕа үөрэнэллэр, Арассыыйаҕа уонна тас дойдуга тарбахха баттанар үрдүк кылаастаах исписэлиистэр буола үүннүлэр.
Билигин лиссиэйгэ 209 оҕо үөрэнэр, оттон быйыл 24 үөрэнээччи бүтэрэр. Хомойуох иһин, лиссиэй билигин олус ыарахан усулуобуйаҕа үөрэнэ олорор. Бэйэтэ бас билэр дьиэтэ суох, үөрэнэр сир олох тиийбэт. Үөрэнээччилэр, төрөппүттэр, учууталлар ыра санаалара – бас билэр дьиэлэнии буолар.
