Киир

Киир

Мииринэй оройуонун Ботуобуйа нэhилиэгэ (Таас-Yрэх) – Саха Өрөспүүбүлүкэтин бүддьүөтүгэр, трансфер быhыытынан, кэнники сыллар устата үгүс мөлүйүөнүнэн солкуобай харчыны киллэрдэ. Дьэ бу – сүрдээх дьыала!

Саха сирин түгэҕэр, үрэх баһыгар сытар баара эрэ 400-чэ киһилээх нэһилиэк бүддьүөттэн үп-харчы ыларын оннугар харчы киллэрэр .

Маннык үп-харчы киириитэ нэһилиэк сиригэр-уотугар баар ньиэп-гаас тэрилтэлэрин кытары «түүлэhииттэн» тосхойор.

Нэhилиэк сиригэр-уотугар ньиэп-гаас промышленноһа күөнтээбитэ ыраатта. Олортон сорохторуттан көмө мэлигир. Билигин Орто Ботуобуйатааҕы углеводородтаах сиргэ 5 мөл. туонна ньиэп, 160 млрд. кууп гаас хостонор.

Таас-Үрэх гааһа «Илин Сибиир-Чуумпу акыйаан» («Сила Сибири») ньиэп-гаас улуу утумугар холбоһор.

Саамай сүрүнэ - гаас Таас-Yрэхтэн Мииринэй оройуонун нэhилиэнньэлээх пууннарыгар тириэрдиллэр.

Гаас утумун Удачнайга диэри уhуна – 623 биэрэстэ. Бу гаастан, Мииринэй, Айхал уонна Удачнай алмаас хостуур эбийиэктэрэ, инфраструктуралара туhана олороллор.

Таас-Yрэххэ, Саха сирин бырабыыталыстыбата, уруккаттан социальнай хабааннаах эбийиэктэри кимиилээхтик туттаран сайыннарыахтаах этэ. Оччотугар Таас-Үрэх нэһилиэнньэтин сүтэриэ суох этэ.

Итинтэн сэдиптээн, Саха сирин салалтата бу кырыыба сиргэ болҕомтун уурара буоллар диэн этэ-тыына сатаабытым ыраатта.

Тыын боппуруостар тула ыйытыктаах «Ботуобуйа» нэһилиэгин дьаһалтатын баһылыгар Агния Семеновна Симоноваҕа сотору-сотору тиийэбин. Бу сырыыга Таас-Үрэххэ МФЦ дьиэтин тутуу боппуруоһа хайдах барарын токоолостум.

А.С. Симонова, баһылык: «МФЦ дьиэтин тутуута – биһиги бүгүҥҥү сүрүн сорукпут. Бу – нэһилиэнньэ олоҕор сүрдээх дэгиттэр туһалаах эбийиэк буолуоҕа. Тутуу таас барыйаанынан дьэндэтиллиэхтээх. Эргэ кулууппут манна көһүөҕэ. Маны тэҥэ успуорт, актовай саалалар бырайыакка бааллар. МФЦ биир өттүн федеральнай буоста салаата ылыаҕа. Биир кэҥэс хоһу олох-дьаһах хоммунаалынай хаһаайыстабытын пууна оҥоруохпут. Эбийиэк үбүлээһинин «ТаасҮрэхнефтгаздобыча» тэрилтэ ылынна. Оттон тутуу саҕаланыытын туһунан этэр буоллахха, МФЦ барыла судаарыстыбаннай эспэртииһэ барар».

Агния Семеновна бу былаан кэмниэ-кэнэҕэс олоххо киирэригэр санаата бөҕөх. МФЦ тутулуннаҕына, Таас-Үрэх сайдыытыгар биир олугунан буолуо этэ.

Станислав Алексеев. Мииринэй куората. Ааптар хаартыската.

Тарҕат:

Санааҕын суруй