Үөһээ Бүлүүттэн хаһыат актыыбынай ааҕааччыта, уопсастыбаннай кэрэспэдьиэн, үлэ бэтэрээнэ И.Н. Харитонов төлөпүөнүнэн “Быйыл өрөспүүбүлүкэ 100 сылын туолбут улахан эппиэттээх сыла. Дойду салалтата ас-үөл өттүнэн куттал суох буолуутугар сүрүн болҕомтотун уурар. Биһиэхэ тыа хаһаайыстыбатыгар сыл аайы балаһыанньабыт ыарыыр. Онон, саха төрүт дьарыгын чахчы күүскэ сайыннарар, ыччаты т/х сыһыарарга хамсатыылаах дьаһаллары ылар туһугар Үөһээ Бүлүү улууһун дьаһалтатын, мунньаҕын, ТХУ салалтатын, улуус уопсастыбаннаһын аатыттан Ил Түмэҥҥэ, Бырабыыталыстыбаҕа, улуустар салайааччыларыгар улахан ыҥырыы бэлэмнэнэн эрэр” диэн бэрт интэриэһинэй сонуну кэпсээтэ.
Ыҥырыы киирбит туруорсуу сүрүн пууннара:
- Т/х сайыннарыыга өрөспүүбүлүкэ бүддьүөтүн 15% бэриллиэхтээх.
- Үүт бэйэтин оҥоһуллар сыанатынан, биир киилэтэ 130 солк. тутуллара олохтонуохтаах.
- Ынахха 35 тыһ. солк. бэриллэрин курдук, төрүүр биэҕэ 45 тыһ. солк. өйөбүл көрүллүөхтээх.
- Сири оҥорууга сыһыаны уларытан, атын дойдуларга курдук элбэх үбү уган, сыл аайы элбэх от оттонор сэниэлээх, көдьүүстээх дьаһаллары ыларга.
Иван Николаевич: “Тыа сиригэр олох уустугурбутун, т/х дьарыктанар дьон аҕыйыы турарын туһунан кырдьыгынан кэпсэтиэххэ. Нэһилиэктэртэн дьон киин сирдэргэ көһөн, үөрэнэр оҕо аҕыйаата. Т/х тиэхиньикэтин сыаната ыараханынан дьону чаҕытар. Холобур, “Бөлөрүүс” биир көлүөһэтэ 50 тыһ., уматык 1 л сыаната үүт тутуллар сыанатыттан быдан ыарахан. Онон үүтү 10 солк, бэл, 50 солк. да туттаран ити сыананы сиппэт буоллубут. Элбэх сир быраҕыллан, оттоммот буолан иһэр. Атырдьах ыйын 16 к. оттооһун былаана өрөспүүбүлүкэ үрдүнэн, баара-суоҕа 54% эрэ туолан иһэр. Элбэх сир, аҕыйаҕа суох оттоммут от ууга барда. От суоҕунан сүөһү ахсаана эмиэ биллэрдик аҕыйыа. Балаһыанньаны көннөрөр биир эрэ суол баар – тыа хаһаайыстыбатыгар бүддьүөт 15% бэриллиэхтээх. Аан дойдуга балаһыанньа улаханнык тыҥаата, араас буолуон сөп. Биһиги Аҕа дойду сэриитин кэмигэр уонунан тыһыынча дьоммут хоргуйууттан өлбүттэрин, доруобуйаларын айгыраппыттарын хатылатыа суохтаахпыт”, - диэн, тоҕо суһал дьаһаллар ылыллаллара ирдэнэрин туһунан бэйэтин санаатын эттэ.
Бэйэ кэр.
