Ахтабыт, саныыбыт, суохтуубут...

Олоҕун сыллара: 29.09.1945 - 06.01.2023

Подробности

Биһиги аймах саамай күндүтүк саныыр, ытыктыыр, биир тумус туттар тутаах киһибит, аҕа баһылыкпыт, тапталлаах кэргэним, аҕа­быт, эһэбит, хос эһэбит Ермолаев Григорий   Капитонович күн сириттэн барбыта 40 хонугун ааста.

Күндү киһибит 1945 сыл балаҕан ыйын 29 күнүгэр Уус Алдан улууһун Курбуһах нэһилиэгин Балаҕаннаах сэлиэнньэтигэр Ермолаев Капитон Филиппович диэн Албан Аат III истиэпэнэ уордьан кавалера, икки сэрии кыттыылааҕын дьиэ кэргэнигэр күн сирин көрбүтэ. Ийэлэрэ эрдэ өлөн, оҕо эрдэҕиттэн олох уйанын-хатанын билэн, үлэҕэ эриллэн-мускуллан улааппыта.

Курбуһах интэринээт-оскуолатын бүтэрэн, Сэбиэскэй Аармыйа тааҥка чааһыгар сулууспалаан баран, ССРС Ис дьыала министиэристибэтин Волгоградтааҕы үрдүкү силиэстийэлиир оскуолатыгар үөрэххэ киирэн 1969–1973 сс. үөрэммитэ.

Үөрэҕин бүтэрэн, Мииринэйгэ, Муомаҕа, Намҥа ис дьыала отделын силиэдэбэтэлинэн, ыстаарсай силиэдэбэтэлинэн, Уус Алданнааҕы силиэстийэлиир отделение начаалынньыгынан үлэлээбитэ.

Үлэлээбит сылларын тухары идэтигэр бэриниилээх, кыһамньылаах, хайдах баҕарар уустук дьыаланы дөбөҥнүк ылсан, ситиһиилээхтик тиһэҕэр тиэрдэр үтүө суобастаах үлэһит быһыытынан биллэрэ. Бэйэтигэр да, дьоҥҥо да ирдэбиллээх буолан, өрүү билиитин хаҥатарга дьулуһара. Саҥа көлүөнэ исписэлиистэргэ улахан болҕомто ууран, уустук үлэ үөрүйэҕэр уһуйара.

Григорий Капитонович үлэтин таһынан олус көх­төөх уопсастыбанньык Үлэтин тиэмэтинэн лиэксийэ, дакылаат ааҕара, бэчээккэ тахсара. Успуорт араас көрүҥэр – хайыһарга, буоксаҕа, саахымакка, буулдьанан ытыыга – дьарыктанара. Урал, Уһук Илин, Сибиир эрэгийиэннэригэр Макаров бэстилиэтинэн ытыыга ССРС ИДьМ-гар хамаанданан күрэххэ икки төгүллээх призёр.

Үлэлиир кэмигэр Саха АССР уонна Саха Өрөспүү­бүлүкэтин ИДьМ Бочуоттаах кыраамататынан хас да төгүл наҕараадаламмыта, “Милииссийэ туйгуна” ааты ылбыта, “Эҥкилэ суох үлэтин иһин” 1, 2, 3 истиэпэннээх мэтээллэринэн наҕараадаламмыта.

1993 сыллаахха юстиция подполковнига сыбаанньалаах биэнсийэҕэ тахсыбыта. Биэнсийэҕэ тахсан баран, СӨ Албакааттар палааталарыгар чилиэнинэн киирэн, Уус Алдаҥҥа аан маҥнай албакаат кэбиниэтин аһан үлэлээбитэ. Үлэтигэр үрдүк сатабылын иһин Арассыыйа Федерациятын Албакааттар палааталарын Бочуоттах кыраамататынан наҕараадаламмыта.

Буулдьанан ытыы федерациятын көҕүлээһининэн ыытыллар өрөспүүбүлүкэтээҕи күрэхтэргэ, турнирдарга, чөмпүйэнээттэргэ улуус аатыттан өрүү кыттан, миэстэлэһэн мэтээлгэ, бириискэ тиксэрэ. Буулдьанан ытыыга СӨ успуордун маастара. 2014 сылтан «Мүрү» байыаннай-патриотическай кулууп чилиэннэрин дьа­рыктаан, өрөспүүбүлүкэтээҕи «Снежный барс», «Защитник Отечества», Арассыыйатааҕы «Победа» күрэхтэргэ ситиһиилээхтик кыттыбыттара.

Саахыматтыырын олус сөбүлүүрэ, «Абылаҥ» диэн саахыматчыттар кулууптарыгар дьарыктаммыта.

Мүрү нэһилиэгин бочуоттаах олохтооҕо, “Уус Алдан улууһун социальнай-экэнэмиичэскэй сайдыытыгар кылаатын иһин” бэлиэ хаһаайына.

Григорий Капитонович 52 сыл бииргэ олорбут улахан, иллээх дьиэ кэргэн аҕа баһылыга, үс оҕону иитэн таһааран, элбэх сиэн, хос сиэн эһэлэрэ.

Дьоҥҥо үтүө сыһыанынан, элэккэй, үөрүнньэҥ майгытынан, аҕалыы кыһамньытынан уратылааҕа.

Ыарахан ыарыыга ылларан да баран, таһыгар биллэрбэккэ, дьиҥнээх эр киһилии тиһэх күнүгэр диэри эрдээхтик тулуйан, санаатын күүһүнэн олох туһугар охсуһа, туруулаһа сатаата... Күүстээх санаалаах, киэҥ көҕүстээх буолан, өлөр-сүтэр туһунан биир да тылы саҥарбакка барда.

Чугас киһибитин сүтэрбит ыарахан кэммитигэр күүс-көмө, өйөбүл буолбут аймахтарбытыгар, оскуола, устудьуон сылларбыт доҕотторугар, өр сылларга бииргэ үлэлээбит кэллиэгэлэрбитигэр, ытыы успуордугар бииргэ алтыспыт үөлээннээхтэригэр муҥура суох улахан махталбытын тиэрдэбит.

Күндү киһибит сырдык мөссүөнэ, үтүө майгыта өйбүтүгэр, сүрэхпитигэр өрүү тыыннаах буолуоҕа. Кини олоҕун холобур оҥостон, ыччаттара салгыахтара.

Олорбут, үлэлээбит Мүрү алааһыҥ буора сымнаҕас тэллэх, сылаас суорҕан буоллун! Быдан дьылларга быраһаай!

Кэргэнэ, оҕолоро, сиэннэрэ.