Ийэбит барахсан кэрэ мөссүөнэ сүрэхпитигэр куруук баар буолуо
- Олоҕун сыллара: 29.04.1947 - 02.02.2023
- Подробности
Тапталлаах күн күбэй ийэбит, эбэбит Розалия Сидоровна уһун ыарахан ыарыыттан 75 сааһыгар бу олохтон букатыннаахтык суох буолбута кулун тутар 13 күнүгэр 40 хонугун туолар.
Ийэбит 1947 сыл муус устар 29 күнүгэр Бүлүү улууһун Балаҕаччы нэһилиэгэр 6 оҕолоох дьиэ кэргэҥҥэ үһүс оҕонон төрөөбүтэ. 1966 сыллаахха Мастаах орто оскуолатын бүтэрэн баран, “школа-производство-вуз” дэбииһинэн салайтаран сопхуоска 2 сыл үлэлээбитэ. Ол кэннэ Дьокуускай куоракка кэлэн Дом малютки (ийэлэрэ аккаастаммыт ыарыһах оҕолор дьиэлэригэр) үлэлээбитэ. Ийэбит ол кэмнэри: «Ол оҕолору олус аһынар этим, тугунан эмэ көмөлөһүөхпүн, эмтээн ыарыыларын чэпчэтиэхпин баҕарарым», – диирэ. Ол иһин да буолуо, ийэбит, эмчит идэтин талан, 1973 сыллаахха Дьокуускайдааҕы медицинскэй училищеҕа үөрэнэ киирбитэ. Эмчит буолар баҕата өссө биир төрүөттээх этэ: бииргэ төрөөбүт убайа Пана доҕолоҥ этэ. Ийэбит кэлин кэпсиирэ: «Убайбын олус аһынар этим, улааттахпына, медик буолан, эмтээн-томтоон көмөлөспүт киһи диэн саныырым», – диирэ. Үөрэҕин 1976 сыллаахха ситиһиилээхтик бүтэрэн, биэлсэр идэтин баһылаан, төрөөбүт Балаҕаччытын нэһилиэгэр Мастаах учаскыабай балыыһатыгар ыҥырыкка сылдьар биэлсэринэн үлэҕэ киирбитэ. Олус эппиэтинэстээхтик, үтүө суобастаахтык, дууһатын-сүрэҕин ууран туран 40-ча сыл үлэлээбитэ. Ийэбит дириҥ билиилээҕэ-көрүүлээҕэ, дьоҥҥо элэккэй сыһыаннаах, аһыныгас майгылаах этэ. Кыһыннары-сайыннары, күнүстэри-түүннэри бэйэтин харыстаммакка нэһилиэгин дьонун-сэргэтин доруобуйатын көрөн-истэн, араҥаччылаан, эмтээн-томтоон сылдьыбыта, кэлэр кэнэҕэски ыччакка күн сирин көрдөрбүтэ. Ийэбитин эппиэтинэстээх үлэһит быһыытынан сыаналаан, «Отличник здравоохранения РС(Я)», «Үлэ бэтэрээнэ» уо.д.а. наҕараадалаабыттара. Өр сылларга балыыһа үлэһиттэрин идэлээх сойууһун бэрэссэдээтэлинэн үлэлээбитэ. Уһуннук үлэлээбит балыыһатын, кэлэктиибин, кэллиэгэлэрин хойутун да олус үчүгэйдик ахтара-саныыра. Ыалдьан олорон: «Хаарыаны, билигин үлэлии-хамсыы сылдьыбыт киһи», – диирэ.
Биһиги ийэбит олус үчүгэй хаһаайка этэ. Дьиэбит наар сырдык, ыраас, дьып-дьап буолара, барыта уурбут-туппут курдуга. Сааһын-сайынын элбэх оҕуруот аһын, сибэкки араас көрүҥүн сөбүлээн олордоро. Чааһы чааһынан оҕуруотугар тахсан түбүгүрэрэ, сибэккилэрин, оҕуруот аһын кытта кэпсэтэрэ, «кинилэр эмиэ дьон курдук истэллэр ээ» диирэ. Оҕуруотун аһын ситиитэ, чугас дьонун, аймахтарын, ыалларын барыларын күндүлүүрэ.
Ийэбит эдэр эрдэҕиттэн иистэнэрин олус сөбүлүүрэ, ийэтэ Мария Даниловнаны батан, кини үөрэтэн-такайан иистэнэр, тигэр буолбута. Ийэбит нэһилиэккэ саамай муодунай этэ. Урут муодунай таҥас-сап аҕыйах кэмигэр балтыларыгар, быраатыгар, дьүөгэлэригэр кырасыабай араас таҥаһы тигэн үөрдэрэ-көтүтэрэ. Кэлин биһиги, оҕолоро, төрөөбүппүт кэннэ, барыбытыгар чараас таҥастан саҕалаан кыһыҥҥы таҥаска тиийэ тигэрэ. “Бэйэтин көрүнэр, кэрэ сэбэрэлээх, сэмэй да майгылаах этэ” диэн, кэлин дьонтон элбэхтик истэрбит. Ону таһынан минньигэстик да астыыра, ийэбит астык халаачыгын, булочкаларын чугас аймах-уруу дьоммут билиҥҥэ диэри ахталлар-саныыллар.
Сайынын сир аһын хомуйарын ордук сөбүлүүрэ, отоҥҥо, моонньоҕоҥҥо, болбуктаҕа оҕолорунуун, биһигиннин, балтыларыныын, дьүөгэлэриниин хомуйан, үөрэн-көтөн кэлэрэ.
Оннук үлэлии-хамсыы сылдьан, 2014 сыл атырдьах ыйыгар ыараханнык ыалдьан, доруобуйата кыһайан, Дьокуускай куоракка көһөн кэлбиппит.
I курууппалаах инбэлиит буолбута. Барыбытыгар олус да ыарахан этэ... Ол курдук 8,5 сыл устата Дьокуускайга гемодиализка сылдьыбыта. Ол да буоллар олоҕун тиһэх күннэригэр диэри улаханнык ыалдьабын диэн муҥатыйбакка, сытан хаалбакка сылдьыбыта. Ийэбит барахсан олоххо олус дьулуурдааҕа, кэрэҕэ-сырдыкка тардыһар, күүстээх санаалаах сырдык киһи этэ.
Ийэбит суох буолбут ыарахан күннэрбитигэр биһиэхэ күүс-көмө, сүбэ-ама буолбут чугас аймахтарбытыгар, доҕотторбутугар, ийэбит үөлээннээхтэригэр, үлэлээбит балыыһатын кэлэктиибигэр, бииргэ үлэлиир кэллиэгэлэрбитигэр, дойдубут дьонугар-сэргэтигэр барҕа махталбытын тиэрдэбит. Ийэбит барахсан сырдык, кэрэ мөссүөнэ сүрэхпитигэр куруук баар буолуо.
Таптыыбыт, суохтуубут, ахтабыт.
Кэргэнэ, оҕолоро, сиэннэрэ.