Биһиги тапталлаах оҕобут

Олоҕун сыллара: 26.07.1980-16.06.2023

Подробности

Биһиги тапталлаах оҕобут ФИЛИППОВ ПЁТР ВАСИЛЬЕВИЧ мобилизация биллэриллибит бастакы кэмнэригэр, 2022 сыл балаҕан ыйын 23 күнүгэр бэбиэскэ тутаат да, биир да мүнүүтэ кэхтибэккэ, толлубакка саллаат чиэһин өрө тутан, Украинаҕа сиригэр сэриигэ барбыта. Соһуччу баҕайытык уолбутун ол күн киэһэ сборнай пуунугар атаарбыппыт.

Биһиги дьиэ кэргэн күүтүүлээх бастакы оҕобут Петя 1980 сыл от ыйын 26 күнүгэр Дьокуускай куоракка күн сирин көрбүтэ. Оҕо сааһыттан билиигэ-көрүүгэ тардыһара, түргэн-тарҕан быһый уол этэ, дьону кытары уопсай тылы начаас булара, күлэн-үөрэн, мэниктээн олохпутун сырдатара. Буспут моонньоҕон курдук хап-хара хараҕынан чоҕулуччу көрбүт сытыы-хотуу уолчааны тулалыыр дьон сөбүлүүллэрэ, чорбото көрөллөрө. Бииргэ төрөөбүт аҕыс сыл балыс тапталлаах быраата Никифоры наһаа кыһаллан көрөрө-бодьуустаһара. 1987 сыллаахха Дьокуускай куорат 22-с нүөмэрдээх оскуолатыгар 1-кы кылааска киирбитэ.

Аҕабыт дойдутугар үлэҕэ ананан, Ньурба улууһун Малдьаҕар нэһилиэгэр 1992 сыллаахха көспүппүт. Маҥнай тиийэрбитигэр нууччалыы саҥарар оҕо начаас уу сахалыы саҥарарга, толкуйдуурга үөрэммитэ. Кылааһын оҕолоругар ылыннарыылаах тыллаах, убаастанар доҕор буолбута, бииргэ улааппыт оҕолорунуун олоҕун тухары истиҥ-чугас сыһыаннарын ыһыктыбатахтара, кинилэри мэлдьи өрө тутан, чугастык санаан кэлбитэ. Оскуолаҕа тустууннан, сүүрүүнэн сөбүлээн дьарыктаммыта, кыттыбыт күрэхтэригэр хайаан даҕаны миэстэлэһэн үөрдэрэ. Оскуола, нэһилиэк тэрээһиннэригэр барытыгар көхтөөхтүк кыттара. Тыа сирин оҕото буолан, булка-алка сыстан, от-мас үлэтин толору толорон, уолбут саха эр киһитин үлэтин-хамнаһын барытын сатыыра. Тутуу буоллун, тиэхиньикэ өрөмүөнэ буоллун, сахалыы мындыр өйүнэн, туохтан да толлон турбакка, аймах-билэ дьонугар көмөлөһөрө, сүбэ-ама буолара.

Уолбут, Малдьаҕар орто оскуолатын 1997 сыллаахха бүтэрэн, Дьокуускай куорат 1 нүөмэрдээх профессиональнай лиссиэйигэр үөрэнэн слесарь-автомеханик идэтин ылбыта.

1999 сыллаахха аармыйаҕа ыҥырыллан барбыта. Уссурийскай куоракка, аатырбыт 83-үс нүөмэрдээх ВДВ чааһыгар икки сыл сулууспалаан кэлбитэ. Сулууспалаабыт сиринэн киэн туттара, бииргэ сылдьыбыт дьонугар ытыктабыллаах сыһыаннааҕа. Олоҕун тухары ВДВ саллаатын аатын үрдүктүк тутан кэлбитэ. Саха сиринээҕи, ВДВ-га сулууспалаабыт эр дьон түмсүүлэрин биир тутаах кыттыылааҕа этэ. Ол курдук, үгэс буолбут Улуу Кыайыы күнүгэр анаммыт параакка хайаан да кыттара. Бэтэрээннэргэ, ону таһынан нэһилиэнньэ кыаммат араҥатыгар анаммыт көмө аахсыйалары иилээн-саҕалаан тэрийэн бу күннэргэ кэлбитэ. Уолбут ол курдук чиэстээх, төрөөбүт дойдутугар, дьонугар-сэргэтигэр бэриниилээх этэ. Ол туоһута -- 2021 сыллаахха Саха Өрөспүүбүлүкэтин Байаҥкамаатын Кыраамататынан наҕараадаламмыта.

Аармыйаттан 2001 сылга дойдутугар эргиллэн баран, Дьокуускай куораттааҕы ППС-ка, ЧОП “Безопасность”, ООО СТК, ЧОП “Кондор”, 2-с нүөмэрдээх ОВД-га, “Комитет занятости и труда” уо.д.а. тэрилтэлэргэ үлэлээн ааспыта.

2010 сыллаахха олоҕун доҕоро, Горнайтан төрүттээх Светлана Спиридоновалыын көрсөн ыал буолан, үс сиэн оҕону бэлэхтээн, эрэллээх кэргэн, үс оҕо амарах аҕата буолан, Петябыт дьиэ кэргэннээх, оҕолоох-уруулаах буолар дьолу толору билэн, тапталлаах кэргэниниин 13 сыл олордулар.

Кини биһиги аймаҕы, эдьиийдэрин-балыстарын, убайдарын-бырааттарын түмэ тутара, барыларыгар үтүө сүбэһит этэ, тутуу, тиэйии-таһыы, от-мас, өрөмүөн өттүгэр кинитэ суох хамсаныы буолбат этэ. Аймахтарын ыҥырталаан даачаҕа көрсүһүүлэри тэрийэрин астынааччы, кулуһуҥҥа ас-астаан оҕо-уруу буолан, бары оонньоон-көрүлээн ааһааччыбыт.

Итини барытын сэрии быспыта... Уоттаах сэрии толоонугар тоҕус ый сылдьан, саллаат ыарахан олоҕун этинэн-хаанынан, өйүнэн-санаатынан толору билбитэ. 2022 сыл кыһын бааһыран аҕыйах хонукка биһиэхэ, дойдутугар, кэлэ сылдьыбыта. Сэрии иэдээнэ кини хараҕар ааспат бэчээт, дууһа ыарыыта буолбута көстөрө. Байыаннай чааһыгар ахсынньы ыйга төннөөтүн кытары тутатына киниэхэ байаҥкамааттан элбэх оҕо аҕатыгар анаммыт байыаннай ыҥырыыттан босхолонор бырааптааҕын туһунан сурук кэлбитэ. Ону буолумматаҕа: «Бииргэ сылдьар уолаттарбын хааллартаан куотуом дуо», – диэн эппитэ. Ол курдук кини тиһэх күннэрэ сэрии толоонугар, Украина Запорожье уобалаһыгар, ааспыттара, 2023 сыл бэс ыйын 16 күнүгэр оҕобут барахсан сырдык тыына быстыбыта.

Уолбут олохтон туораабытын кэннэ РФ бэрэсидьиэнин уурааҕынан Эр Санаа уордьанынан наҕараадаламмыта. Оҕобут уордьанынан киэҥ туттуо этэ, ол эрээри ханнык да наҕараада кинини аны эргиппэт.

Уолбут күн сириттэн күрэниэҕиттэн маҥнайгы уһун сыла бүтэн эрэр... Оо, хайдахтаах курдук ыарахан сыл ааспытын оҕолорун сүтэрбит төрөппүттэр, эрдэрэ сэрииттэн төннүбэтэх кэргэннэр уонна аны хаһан да аҕаларын көрбөт оҕолор эрэ билээхтииллэр...

Хаарыан тапталлаах уолбутун, убайбытын, бырааппытын, олохпут доҕорун, аҕабытын бары суохтуубут. Биһигини, төрөппүттэрин, таптаан-харыстаан, өрө тутан илдьэ сылдьыбыта, биһиги инники эрэлбит этэ...

Кини сырдык мөссүөнэ, ыраас дууһата, чаҕылхай кылгас олоҕо олохпут тухары сүрэхпитигэр баар буолуоҕа, хорсун быһыы, эр киһилии кытаанах санаа холобура буолан үйэлэргэ хаалыаҕа.

Уолбут үөрбүт-көппүт сааһын үтүө аргыстарыгар, бэриниилээх доҕотторугар, кини олоҕор арыалдьыт, киниэхэ күүс-көмө, дурда-хахха, буолбут аймах-билэ дьонугар, оҕобут олоҕор баар буола сылдьыбыккытыгар махталбытын тиэрдэбит.

Аны бу олоххо кимиэхэ даҕаны, хаһан даҕаны маннык ыар сүтүк аһыы амтана биллибэтигэр баҕарабын. Сэрии тохтоотун, үйэлэргэ барыбытыгар эйэлээх халлаан сыдьаайдын!!!

Төрөппүттэрэ Маргарита Петровна, Василий Никифорович, кэргэнэ Светлана, оҕолоро уонна быраата Никифор.